വാഷിങ്ടണ്‍: പലചരക്ക് സാധനങ്ങളുടെ വില ഉയര്‍ന്നു വരുന്ന സാഹചര്യത്തില്‍ ഉപഭോക്താക്കള്‍ക്കിടയില്‍ വര്‍ധിച്ചു വരുന്ന ആശങ്ക കണക്കിലെടുത്ത് ഭക്ഷണപദാര്‍ഥങ്ങളുടെ താരിഫ് വെട്ടിക്കുറച്ച് യുഎസ് പ്രസിഡന്റ് ഡൊണാള്‍ഡ് ട്രംപ്. ബീഫ്, കോഫി, നേന്ത്രപ്പഴം തുടങ്ങി നിരവധി ഭക്ഷണസാധനങ്ങള്‍ക്കാണ് വെള്ളിയാഴ്ച മുതല്‍ ഇളവ് അനുവദിച്ചിരിക്കുന്നത്.

തെരഞ്ഞെടുപ്പില്‍ വിജയിച്ചതിന് ശേഷം ആദ്യമായി താന്‍ നടപ്പാക്കിയ ഇറക്കുമതി തീരുവകള്‍ പണപ്പെരുപ്പത്തിന് കാരണമാകുന്നില്ല എന്നായിരുന്നു ട്രംപ് വാദമുന്നയിച്ചത് . എന്നാല്‍, ഈ നിഗമനത്തെ പാടെ അപ്രസക്തമാക്കുന്ന തരത്തിലാണ് പുതിയ നീക്കമുണ്ടായിരിക്കുന്നത്.
കൂടാതെ, വിര്‍ജീനിയ, ന്യൂജേഴ്‌സി, ന്യൂയോര്‍ക്ക് സിറ്റി എന്നിവിടങ്ങളിലെ പ്രാദേശിക തെരഞ്ഞെടുപ്പുകളില്‍ ഡെമോക്രാറ്റുകള്‍ വിജയിച്ചതിന് പിന്നാലെ ജനങ്ങളുടെ താങ്ങാനാവാത്ത ജീവിതച്ചെലവും പ്രധാന ചര്‍ച്ചാ വിഷയമായിരുന്നു.

പുതിയ വ്യാപാരക്കരാറിന് വൈകാതെ തുടക്കമാകുമെന്നും വ്യാഴാഴ്ച ട്രംപിന്റെ ഓഫിസ് അറിയിച്ചിട്ടുണ്ട്. പുതിയ കരാറുകള്‍ ആരംഭിക്കുന്നതോടെ അര്‍ജന്റീന, ഇക്വഡോര്‍, ഗ്വാട്ടമല, സാല്‍വദോര്‍ എന്നിവിടങ്ങളില്‍ നിന്ന് ഇറക്കുമതി ചെയ്യുന്ന 20 ഓളം ഭക്ഷണസാധനങ്ങളുടെ ഇറക്കുമതിച്ചുങ്കം വെട്ടിച്ചുരുക്കുമെന്നും ട്രംപ് അറിയിച്ചു.

സെപ്റ്റംബറിലെ കണക്കുകള്‍ പ്രകാരം ബീഫിന് ഏകദേശം 13 ശതമാനം വില വര്‍ധനവാണുണ്ടായിരുന്നത്. വാഴപ്പഴത്തിന് 7 ശതമാനവും വര്‍ധനവുണ്ടായപ്പോള്‍ തക്കാളിക്ക് 1 ശതമാനമാണ് വില വര്‍ധനവു രേഖപ്പെടുത്തിയത്. ഉത്പന്നങ്ങളുടെ വില വര്‍ധനവ് യുഎസിലെ കുടുംബങ്ങളെ ബാധിച്ചതോടെയായിരുന്നു ട്രംപിന്റെ പിന്മാറ്റം.

U.S. President Donald Trump has announced tariff reductions on various food items—including beef, coffee, and bananas—amid rising grocery prices and growing public concern. The move contradicts his earlier claim that tariffs were not contributing to inflation. It comes shortly after Democratic wins in Virginia, New Jersey, and New York City, where the high cost of living was a key issue. A new trade agreement will begin soon, reducing import duties on about 20 food products from Argentina, Ecuador, Guatemala, and El Salvador.