റിയാദ്: യോഗ്യരായ വിസ കാർഡ് ഉടമകൾക്ക് ഇലക്ട്രോണിക് ടൂറിസ്റ്റ് വിസ മിനിറ്റുകൾക്കുള്ളിൽ നേടാൻ സാധിക്കുന്ന 'വിസ ബൈ പ്രൊഫൈൽ' സംരംഭത്തിന് തുടക്കം കുറിച്ച് സഊദി അറേബ്യ. വരും വർഷങ്ങളിൽ സംരഭം രാജ്യത്തിന്റെ ടൂറിസം മേഖലയിൽ വൻ കുതിപ്പിന് വഴിയൊരുക്കുമെന്നാണ് വിദ​ഗ്ധർ പറഞ്ഞുവയ്ക്കുന്നത്. സഊദി ടൂറിസം മന്ത്രി അഹമ്മദ് അൽ-ഖതീബാണ് പ്രഖ്യാപനം നടത്തിയത്.

"TOURISE25-ൽ ഞങ്ങൾ അഭിമാനത്തോടെ 'വിസ ബൈ പ്രൊഫൈൽ' അവതരിപ്പിക്കുന്നു. യോഗ്യരായ വിസ കാർഡ് ഉടമകൾക്ക് അവരുടെ കാർഡും പാസ്‌പോർട്ട് വിവരങ്ങളും മാത്രം ഉപയോഗിച്ച് മിനിറ്റുകൾക്കുള്ളിൽ ടൂറിസ്റ്റ് വിസ നേടാൻ അനുവദിക്കുന്ന, ലോകത്തിലെ ആദ്യത്തെ സംരംഭമാണിത്," ടൂറിസം മന്ത്രിയായ അൽ-ഖതീബ് തന്റെ എക്‌സ് അക്കൗണ്ടിലൂടെ അറിയിച്ചു.

ആഭ്യന്തര മന്ത്രാലയം, വിദേശകാര്യ മന്ത്രാലയം, ആഗോള ധനകാര്യ സേവനദാതാക്കളായ വിസ, സഊദി ടൂറിസം അതോറിറ്റി എന്നിവയുടെ സഹകരണത്തോടെയാണ് സംരംഭം വികസിപ്പിച്ചിരിക്കുന്നത്. തടസ്സമില്ലാത്തതും സാങ്കേതികവിദ്യാധിഷ്ഠിതവുമായ യാത്രാനുഭവങ്ങൾ നൽകാനുള്ള രാജ്യത്തിന്റെ പ്രതിബദ്ധതയാണ് ഇതിലൂടെ വ്യക്തമാകുന്നത്. 

"ഇങ്ങനെയാണ് ഞങ്ങൾ ടൂറിസത്തിന്റെ ഭാവി കെട്ടിപ്പടുക്കുന്നത്, ലളിതവും, സുഗമവുമായ രീതിയിൽ," മന്ത്രി കൂട്ടിച്ചേർത്തു.

ALSO READ: സൗദിയുടെ ആകാശത്തും ഇനി പറക്കും ടാക്സികൾ, യുഎസ് കമ്പനിയുമായി കരാർ ആയി

ടൂറിസം ലക്ഷ്യങ്ങൾ പുതുക്കി നിശ്ചയിച്ചു

സഊദി അറേബ്യയുടെ ടൂറിസം മേഖലയുടെ വളർച്ചാ നിരക്ക് വളരെ ശ്രദ്ധേയമാണ്. 2024-ൽ അന്താരാഷ്ട്ര വിനോദസഞ്ചാരികളുടെ വരവിന്റെ കാര്യത്തിൽ ജി20 രാജ്യങ്ങളിൽ ഒന്നാം സ്ഥാനത്ത് എത്താൻ സഊദിക്ക്  കഴിഞ്ഞിരുന്നു. കൂടാതെ, ഇൻബൗണ്ട് സന്ദർശകരിൽ നിന്നുള്ള ടൂറിസം വരുമാന വളർച്ചയിൽ രാജ്യം ആഗോളതലത്തിൽ മുന്നിലാണ്.

2023-ൽ, നിശ്ചയിച്ച സമയത്തിന് ആറ് വർഷം മുമ്പ് തന്നെ 100 ദശലക്ഷം സന്ദർശകർ എന്ന പ്രാരംഭ ലക്ഷ്യം രാജ്യം മറികടന്നിരിക്കുകയാണ്. ഇതോടെ, 2030-ഓടെ പ്രതിവർഷം 150 ദശലക്ഷം വിനോദസഞ്ചാരികളെ (70 ദശലക്ഷം അന്താരാഷ്ട്ര സഞ്ചാരികളും 80 ദശലക്ഷം ആഭ്യന്തര സഞ്ചാരികളും) സ്വാഗതം ചെയ്യുക എന്ന പുതിയ ലക്ഷ്യം സഊദി നിശ്ചയിച്ചിട്ടുണ്ട്.

പുതിയ സംരംഭങ്ങളും സഹകരണവും

റിയാദിലെ കിംഗ് അബ്ദുൽ അസീസ് ഇന്റർനാഷണൽ കോൺഫറൻസ് സെന്ററിൽ നടന്ന മൂന്ന് ദിവസത്തെ ടൂറിസ്റ്റ് ഉച്ചകോടിയുടെ (TOURISE25) അവസാന ദിവസമാണ് അൽ-ഖതീബ് 'വിസ ബൈ പ്രൊഫൈൽ' കൂടാതെ മൂന്ന് സംരംഭങ്ങൾ കൂടി പ്രഖ്യാപിച്ചത്. ഏജന്റ് ടൂറിസം, ടൂറിസ്റ്റ് ഡെസ്റ്റിനേഷൻ, ബിയോണ്ട് ടൂറിസം എന്നിവയാണ് മറ്റ് മൂന്നു പദ്ധതികൾ.

രാജ്യത്തെ ടൂറിസം-ഹോസ്പിറ്റാലിറ്റി മേഖലയെ ശക്തിപ്പെടുത്തുന്നതിനായി ലോകമെമ്പാടുമുള്ള പ്രമുഖ ആഗോള സ്ഥാപനങ്ങളുമായും ഹോസ്പിറ്റാലിറ്റിയിലെ മികച്ച സ്ഥാപനങ്ങളുമായും തന്ത്രപരമായ പങ്കാളിത്തം പ്രഖ്യാപിച്ചതായും മന്ത്രി വ്യക്തമാക്കി.

Saudi Arabia has introduced the new ‘Visa by Profile’ initiative, allowing travellers to receive visas within minutes based on digital profiles. The system aims to simplify entry procedures, enhance tourism growth, and speed up approval through automated verification and advanced data assessment.