കോഴിക്കോട്: സ്‌കൂളിലെ ഓണാഘോഷങ്ങള്‍ സമൂഹികവിരുദ്ധര്‍ അലങ്കോലമാക്കി. കോഴിക്കോട് പുതിയറ ബി.ഇ.എം യു.പി സ്‌കൂളില്‍ ഓണാഘോഷത്തിനായി തയ്യാറാക്കിയ ഭക്ഷണം നശിപ്പിക്കുകയും അടുപ്പില്‍ മലവിസര്‍ജനം നടത്തുകയും ചെയ്തിട്ടുണ്ട്.

ഓണാഘോഷത്തിനുള്ള ഭക്ഷണവും മറ്റു ഒരുക്കങ്ങളുമെല്ലാം രാത്രി തയ്യാറാക്കിയ ശേഷം മാതാപിതാക്കളും അധ്യാപകരും മടങ്ങുകയായിരുന്നു. മുറി കുത്തിത്തുറന്ന് അക്രമണം നടത്തിയതായാണ് കാണപ്പെട്ടത്.

സംഭവം പൊലിസ് അന്വേഷിക്കുമെന്ന് ജില്ലാ കലക്ടര്‍ എന്‍.പ്രശാന്ത് അറിയിച്ചു. സ്‌കൂളിലെ ഓണാഘോഷം നശിപ്പിച്ചത് വൃത്തികെട്ട പരിപാടിയെന്നും ഓണസദ്യ ഇന്ന് തന്നെ സ്‌കൂളില്‍ നടത്തുമെന്നും ജില്ലാ കലക്ടര്‍ പറഞ്ഞു. ആഘോഷം തടസ്സപ്പെടാതിരിക്കാന്‍ സദ്യ ഉള്‍പ്പെടെയുള്ള കാര്യങ്ങള്‍ ജില്ലാ ഭരണകൂടത്തിന്റെ നേതൃത്വത്തില്‍ ഇന്ന് തന്നെ ഒരുക്കുമെന്നും കലക്ടര്‍ പറഞ്ഞു.