തളിപ്പറമ്പ്: ദേശീയപാതയില്‍ ബസ് സ്റ്റാന്റിനുമുന്നിലെ അറ്റ്‌ലസ് ജ്വല്ലറിയില്‍ തീപിടിത്തം. വ്യാഴാഴ്ച അര്‍ദ്ധരാത്രിയോടെയാണ് ജ്വല്ലറിയുടെ പ്രധാന മുറിയോട് ചേര്‍ന്ന് ഇന്‍വര്‍ട്ടറും ഗിഫ്റ്റുകളും ഫയലുകളും സൂക്ഷിച്ച മുറിക്ക് തീപിടിച്ചത്. ഷോര്‍ട്ട് സര്‍ക്ക്യൂട്ടാണ് അപകട കാരണമെന്നാണ് പ്രാഥമിക നിഗമനം. ഇന്‍വര്‍ട്ടര്‍ ഉള്‍പ്പെടെ ഇലക്ട്രോണിക് ഉപകരണങ്ങളും വയറിങ്ങും രേഖകളും കത്തിനശിച്ചു. നാലു ലക്ഷത്തോളം രൂപയുടെ നഷ്ടം കണക്കാക്കുന്നു. അഗ്നിശമനസേനയെത്തിയാണ് തീ അണച്ചത്. നിരവധി സ്ഥാപനങ്ങള്‍ പ്രവര്‍ത്തിക്കുന്ന കെട്ടിടത്തില്‍ തീപിടിത്തം പെട്ടെന്ന് ശ്രദ്ധയില്‍പെട്ടതിനാല്‍ വന്‍ അപകടം ഒഴിവായി.