മലയിന്‍കീഴ്: കണ്ടല ഗവണ്‍മെന്റ് ഹൈസ്‌കൂളില്‍ ഇന്നലെ 600 കുട്ടികള്‍ സദ്യയുണ്ടത് ഇവര്‍ തന്നെ കൃഷി ചെയ്ത് വിളവെടുത്ത ജൈവ പച്ചക്കറികള്‍.
സ്‌കൂളിലെ കുട്ടികള്‍ സ്‌കൂള്‍ വളപ്പില്‍ കൃഷി ചെയ്ത് കിട്ടിയതാകട്ടെ നൂറുമേനിയും. ജൈവ പച്ചക്കറിയുടെ മേന്മകള്‍ മനസിലാക്കിയ വിദ്യാര്‍ഥികള്‍ അതിലേക്ക് ഇറങ്ങി തിരിക്കുകയായിരുന്നു. സ്‌കൂളിലെ കാര്‍ഷിക ക്ലബ് കണ്‍വീനര്‍ ആയ അധ്യാപകന്‍ മഹേന്ദ്രകുമാറും മറ്റു അധ്യാപകരും പി.ടി.എ യും അവര്‍ക്ക് എല്ലാ പിന്തുണയും നല്‍കി ഒപ്പം നിന്നു. ഇന്നലെ കാട്ടാക്കട എം.എല്‍.എ സതീഷിന്റെ നേതൃത്വത്തില്‍ കുട്ടികള്‍ നൂറുമേനി വിളവെടുത്തു. ഇന്ന് സ്‌കൂളില്‍ നടക്കുന്ന ഓണസദ്യക്കായി ഉപയോഗിക്കുന്നത് ഈ പച്ചക്കറികളാണ്. വരും വര്‍ഷങ്ങളിലും സ്‌കൂളിലെ പച്ചക്കറി കൃഷി കൂടുതല്‍ വിപുലമായി നടത്താനുള്ള തീരുമാനത്തിലാണ് കുട്ടികളും അധ്യാപകരും.