കൊട്ടാരക്കര: ക്ഷേമപെന്‍ഷനുകളുടെ വിതരണവും സര്‍ക്കാര്‍ മേഖലയിലെ കശുവണ്ടി ഫാക്ടറികളില്‍ ബോണസ് വിതരണവും ആരംഭിച്ചതോടെ കൊട്ടാരക്കര ഓണതിരക്കിലമര്‍ന്നു.
കൈനിറയെ കാശുലഭിച്ചവര്‍ ഓണമൊരുക്കു നടത്തുമ്പോള്‍ സ്വകാര്യ മേഖലയിലെ കശുവണ്ടി തൊഴിലാളികള്‍ ഓണ പ്രതീക്ഷകള്‍ തകര്‍ന്ന് പട്ടിണിസമരവും. ക്ഷേമപെന്‍ഷനുകളും ഓണ ആനുകൂല്യങ്ങളും വിതരണം ചെയ്തു തുടങ്ങിയതോടെ വ്യാപാര മേഖല ഉണര്‍ന്നു. വലിയ ഓഫറുകളുമായി വമ്പന്‍ കമ്പനികളും രംഗത്തെത്തിയിട്ടുണ്ട്. സിവില്‍ സപ്ലൈസിന്റെയും കണ്‍സ്യൂമര്‍ ഫെഡിന്റെയും ഓണച്ചന്തകളിലും നല്ല തിരക്കാണനുഭവപ്പെടുന്നത്. വഴിവാണിഭ രംഗവും കച്ചവടച്ചൂടിലാണ്. ഓണത്തിരക്കാരംഭിച്ചതോടെ വാഹനതിരക്കില്‍ കൊട്ടാരക്കര ടൗണ്‍ വീര്‍പ്പുമുട്ടുകയാണ്. ഓണത്തിനു മുന്നോടിയായി നടപ്പാക്കിയ ട്രാഫിക് പരിഷ്‌കരണം വിജയം കണ്ടിട്ടില്ല. കാഷ്യു കോര്‍പറേഷന്റെയും കാപ്പക്‌സിന്റെയും കശുവണ്ടി ഫാക്ടറികള്‍ പ്രവര്‍ത്തനമാരംഭിച്ചെങ്കിലും സ്വകാര്യ മേഖലയിലെ ഭൂരിപക്ഷം ഫാക്ടറികളും ഒരു വര്‍ഷമായി അടഞ്ഞു കിടക്കുകയാണ്. തൊഴിലാളികള്‍ക്കുള്ള തൊഴിലുടമാവിഹിതങ്ങളും ഭൂരിപക്ഷം ഉടമകളും അടച്ചിട്ടുമില്ല.
ബോണസും അഡ്വാന്‍സും ഒഴിവു ശമ്പളവും സര്‍ക്കാര്‍ പ്രഖ്യാപിച്ച ധനസഹായവും ലഭിക്കണമെങ്കില്‍ ഫാക്ടറികള്‍ തുറന്നു പ്രവര്‍ത്തിക്കണം. ഇതിന് ഉടമകള്‍ തയാറാകാത്ത സാഹചര്യത്തിലാണ് തൊഴിലാളികള്‍ ഫാക്ടറികള്‍ക്കു മുന്നില്‍ രാപ്പകല്‍ സമരം ആരംഭിച്ചത്.