കോഴിക്കോട്: താമരശേരി ചുരത്തില്‍ വന്‍ ഗതാഗതക്കുരുക്ക്. ചുരം കയറാനായുള്ള വാഹനങ്ങളുടെ നീണ്ട നിര അടിവാരം പിന്നിട്ടു. വാരാന്ത്യവും അവധിക്കാലവുമായതിനാല്‍ ആളുകള്‍ കൂട്ടത്തോടെ വയനാട്ടിലേക്കും ഊട്ടി, മൈസൂര്‍ എന്നിവിടങ്ങളിലേക്കും യാത്ര ചെയ്യുന്നതാണ് ഗതാഗതക്കുരുക്ക് വര്‍ധിക്കാന്‍ കാരണം. 

ഇന്ന് പുലര്‍ച്ചെ നാല് മണി മുതല്‍ തുടങ്ങിയ കുരുക്ക് മണിക്കൂറുകള്‍ പിന്നിടുമ്പോഴും രൂക്ഷമായി തുടരുകയാണ്. പൊലിസും സന്നദ്ധപ്രവര്‍ത്തകരും ഗതാഗതം നിയന്ത്രിക്കാന്‍ ശ്രമിക്കുന്നുണ്ട്. 

മുന്‍വര്‍ഷങ്ങളില്‍ പുതുവത്സര തലേന്ന് ചുരത്തില്‍ ഗതാഗതക്കുരുക്ക് ഉണ്ടായിരുന്നു. ഈ സാഹചര്യം പരിഗണിച്ചാണ് ഇത്തവണ മുന്‍കൂട്ടി നടപടികള്‍ സ്വീകരിച്ചിരുന്നെങ്കിലും ഇതൊന്നും ഫലവത്തായില്ലെന്ന് വേണം കരുതാന്‍. യാത്രക്കാര്‍ക്കും വിനോദസഞ്ചാരികള്‍ക്കും ബുദ്ധിമുട്ടുണ്ടാകാത്ത രീതിയില്‍  പുതുവത്സര അവധി ആഘോഷങ്ങള്‍ പരിമിതപ്പെടുത്തണമെന്നും പൊലിസുമായി സഹകരിക്കണമെന്നും അധികൃതര്‍ അറിയിച്ചിരുന്നു. 

അതേസമയം, ജനുവരി 5 മുതല്‍ താമരശ്ശേരി ചുരത്തില്‍ കൂടുതല്‍ ഗതാഗത നിയന്ത്രണം ഏര്‍പ്പെടുത്തുമെന്ന് അധികൃതര്‍ നേരത്തെ അറിയിച്ചിരുന്നു. റോഡ് അറ്റകുറ്റപ്പണികളുടെയും, ചുരത്തിലെ 6, 7, 8 വളവുകളില്‍ മുറിച്ചിട്ടിരിക്കുന്ന മരങ്ങള്‍ ക്രെയിന്‍ ഉപയോഗിച്ച് മാറ്റുന്നതിനും വേണ്ടിയാണ് ഈ നിയന്ത്രണം.

ഈ സാഹചര്യത്തില്‍, ഭാരമേറിയ വാഹനങ്ങളും മള്‍ട്ടി ആക്‌സില്‍ വാഹനങ്ങളും താമരശ്ശേരി ചുരം ഒഴിവാക്കി നാടുകാണി ചുരം വഴിയോ കുറ്റ്യാടി ചുരം വഴിയോ പോകണമെന്ന് നേരത്തെ നിര്‍ദേശം നല്‍കിയിരുന്നു.

A massive traffic jam has been reported at the Thamarassery Ghat in Kozhikode district, with long queues of vehicles extending beyond Adivaram. The congestion is attributed to a heavy rush of holidaymakers and weekend travellers heading towards Wayanad, Ooty, and Mysuru during the vacation season.