തിരുവനന്തപുരം: അസാധാരണ നിമിഷങ്ങള്‍ക്ക് സാക്ഷ്യം വഹിച്ച് നിയമസഭ. സഭയുടെ ബജറ്റ് സമ്മേളനത്തിന്റെ ആദ്യ ദിവസം തന്നെ ബഹളത്തില്‍ മുങ്ങി. ചരമോപചാരത്തിന് പിന്നാലെ തന്നെ  പ്രതിപക്ഷ നേതാവ് വി.ഡി സതീശനാണ് നിയമസഭയില്‍ സ്വര്‍ണക്കൊള്ള ഉയര്‍ത്തി. ശബരിമലയില്‍ നടന്ന സ്വര്‍ണക്കൊള്ളയില്‍ പ്രതിപക്ഷം സമരത്തിലാണെന്നും അതിനാല്‍ സഭാനടപടികളുമായി സഹകരിക്കാന്‍ നിര്‍വാഹമില്ലെന്നും വി.ഡി സതീശന്‍ സ്പീക്കറെ അറിയിച്ചു. തുടര്‍ന്ന് സ്വര്‍ണക്കൊള്ളക്കെതിരായ പ്ലക്കാര്‍ഡുകളുമായി പ്രതിപക്ഷ അംഗങ്ങള്‍ നടുത്തളത്തിലിറങ്ങി.

ഇതിനൊപ്പം പോറ്റിയെ കേറ്റിയെ പാട്ടും പ്രതിപക്ഷം പാടി. ഇതോടെ ഭരണപക്ഷാംഗങ്ങള്‍ പ്രകോപിതരായി. പോറ്റിയും സോണിയ ഗാന്ധിയും ഒപ്പമുള്ള ചിത്രങ്ങളെ സംബന്ധിച്ച ചോദ്യങ്ങള്‍ ഉന്നയിച്ചായി ഭരണപക്ഷത്തിന്റെ പ്രതിരോധം.  വിദ്യാഭ്യാസമന്ത്രി വി.ശിവന്‍കുട്ടി അടക്കമുള്ള ഇടത് നേതാക്കള്‍ ഇത് ഒരു വിഷയമായി ഉയര്‍ത്തികൊണ്ട് വന്നു. ഭരണപക്ഷം മുദ്രാവാക്യം വിളികളുമായി പുറത്തേക്ക് ഇറങ്ങുകയും ചെയ്തു. കൂടെ പ്രതിപക്ഷവും മുദ്രാവാക്യം വിളിച്ചു. 

ALSO READ: 'പോറ്റിയെ കേറ്റിയെ'  ഗാനത്തിനെതിരേ എടുത്ത കേസ് അവസാനിപ്പിച്ചിട്ടില്ലെന്ന് പൊലിസ്

പ്രതിപക്ഷം റൂള്‍ 15 പ്രകാരം അടിയന്തര പ്രമേയത്തിന് നോട്ടിസ് നല്‍കാത്തതിലായിരുന്നു എക്‌സൈസ് മന്ത്രി എം.ബി രാജേഷ് വിമര്‍ശനം ഉന്നയിച്ചത്. ഭീരുത്വം കൊണ്ടാണ് പ്രതിപക്ഷം നോട്ടിസ് നല്‍കാതിരുന്നതെന്നും സ്വര്‍ണക്കൊള്ളയിലെ ചര്‍ച്ചയെ അവര്‍ ഭയക്കുകയാണെന്നും എം.ബി രാജേഷ് ചൂണ്ടിക്കാട്ടി. അസംബന്ധനാടകമാണ് നിയമസഭയില്‍ അരങ്ങേറിക്കൊണ്ടിരിക്കുന്നതെന്നും അദ്ദേഹം കൂട്ടിച്ചേര്‍ത്തു.സോണിയക്കെതിരെ ഭരണപക്ഷ ബെഞ്ചുകളില്‍ നിന്ന് മുദ്രവാക്യം ഉയര്‍ന്നു. 

സ്പീക്കറുടെ ഡയസ് മറച്ചായിരുന്നു പ്രതിപക്ഷ പ്രതിഷേധം. പ്രതിപക്ഷ പ്രതിഷേധത്തെ തുടര്‍ന്ന് സഭ ഇന്നത്തേക്ക് പിരിയുകയായിരുന്നു.

the kerala legislative assembly witnessed chaotic scenes on the opening day of the budget session as opposition members protested over the sabarimala gold smuggling issue, leading to slogan shouting and walkouts by both sides.