കൂത്തുപറമ്പ്: ഓണം സ്‌പെഷല്‍ ഡ്രൈവിന്റെ ഭാഗമായി എക്‌സൈസ് സംഘം കൂത്തുപറമ്പിലും പരിസരങ്ങളിലും നടത്തിയ പരിശോധനയില്‍ വാറ്റുചാരായവും വാഷും പിടികൂടി. ഒരാളെ അറസ്റ്റു ചെയ്തു. കൂത്തുപറമ്പ് എക്‌സൈസ് ഇന്‍സ്‌പെക്ടര്‍ സിനു കോയില്യത്തും സംഘവും വാഴമല, നരിക്കോട്ടുമല എന്നിവിടങ്ങളില്‍ നടത്തിയ പരിശോധനയിലാണ് 10 ലിറ്റര്‍ വാറ്റുചാരായവുമായി നരിക്കോട്ടുമലയിലെ പി. കേളപ്പനെ (50) അറസ്റ്റു ചെയ്തത്.   കൂത്തുപറമ്പ് എക്‌സൈസ് സര്‍ക്കിള്‍ ഇന്‍സ്‌പെക്ടര്‍ പി രാജേന്ദ്രന്റെ നേതൃത്വത്തില്‍ നെടുംപൊയില്‍, കരിമ്പില്‍, ഐരാണിക്കുണ്ട്, ചെക്കിയേരി കോളനി ഭാഗങ്ങളില്‍ നടത്തിയ പരിശോധനയില്‍ മുന്നൂറ് ലിറ്റര്‍ വാഷ് കണ്ടെത്തി. പിന്നീടിവ നശിപ്പിച്ചു. എക്‌സൈസിനു പുറമേ പൊലിസ്, റവന്യൂ, ഫോറസ്റ്റ് വകുപ്പുദ്യോഗസ്ഥരും സംയുക്തമായാണ് പരിശോധന നടത്തിയത്.