തൃശൂര്‍: വാര്‍ധക്യത്തിന്റെ അവശതകള്‍ക്കിടയില്‍ ഒറ്റപ്പെട്ടുപോയ മൂന്ന് സഹോദരിമാര്‍ വിഷം കഴിച്ച് ആത്മഹത്യക്ക് ശ്രമിച്ചു. ആറ്റൂര്‍ മണ്ഡലംകുന്ന് മഠത്തിപ്പറമ്പില്‍ രാമനെഴുത്തച്ഛന്റെ മകള്‍ സരോജിനി (75) അന്തരിച്ചു. ഗുരുതരാവസ്ഥയിലായ സഹോദരിമാരായ ജാനകി (80), ദേവി (83) എന്നിവര്‍ തൃശൂര്‍ മെഡിക്കല്‍ കോളജ് ആശുപത്രിയില്‍ തീവ്രപരിചരണ വിഭാഗത്തില്‍ വെന്റിലേറ്റര്‍ സഹായത്തോടെ ചികിത്സയിലാണ്.

വെള്ളിയാഴ്ച പകല്‍ സമയത്ത് സഹോദരിമാരെ ആരെയും പുറത്തു കാണാതായതോടെ സംശയം തോന്നിയ അയല്‍വാസികള്‍ നടത്തിയ തിരച്ചിലിലാണ് വീട്ടിനുള്ളില്‍ മൂവരെയും അവശനിലയില്‍ കണ്ടെത്തിയത്. ഇവര്‍ക്ക് സമീപത്തുനിന്ന് ശര്‍ക്കരയും വിഷക്കുപ്പിയും കണ്ടെടുത്തു. നാട്ടുകാര്‍ ഉടന്‍ തന്നെ പൊലിസിനെ വിവരമറിയിക്കുകയും ഇവരെ വടക്കാഞ്ചേരി ജില്ലാ ആശുപത്രിയില്‍ എത്തിക്കുകയും ചെയ്‌തെങ്കിലും സരോജിനി അപ്പോഴേക്കും മരണപ്പെട്ടിരുന്നു.

ആരോഗ്യവകുപ്പില്‍ ജീവനക്കാരിയായിരുന്ന സരോജിനിയുടെ വരുമാനത്തിലായിരുന്നു കുടുംബം കഴിഞ്ഞിരുന്നത്. ജാനകി കൂലിപ്പണിക്ക് പോയിരുന്നെങ്കിലും ഇപ്പോള്‍ വയ്യാത്ത അവസ്ഥയിലാണ്. മറ്റൊരാളായ ദേവി ദീര്‍ഘകാലമായി രോഗബാധിതയാണ്. നാല് വര്‍ഷം മുമ്പ് തങ്ങളുടെ വീടും സ്ഥലവും ഇവര്‍ ഗുരുവായൂരപ്പന് എഴുതിവച്ചിരുന്നു. തുടര്‍ന്ന് ദേവസ്വത്തിന്റെ വൃദ്ധസദനത്തില്‍ താമസിച്ചെങ്കിലും ഏതാനും മാസങ്ങള്‍ മുമ്പ് അവിടെനിന്ന് പിണങ്ങി മടങ്ങി വീണ്ടും സ്വന്തം വീട്ടില്‍ താമസിച്ചു വരികയായിരുന്നു.

 ALSO READ: അമ്മയെയും മക്കളെയും ചുട്ടുകൊല്ലാന്‍ ശ്രമം: അനുജത്തിയെ ഓട് പൊളിച്ച് രക്ഷിച്ച് പതിനഞ്ചുകാരന്‍

പഞ്ചായത്ത് പ്രസിഡന്റിനുള്ള കത്തില്‍ സ്വന്തം ഇഷ്ടപ്രകാരമാണ് മരിക്കുന്നതെന്ന് ഇവര്‍ രേഖപ്പെടുത്തിയിട്ടുണ്ട്. തങ്ങള്‍ നല്‍കിയ മരണപത്രവും ആധാരവും ദേവസ്വം അധികൃതര്‍ തിരികെ എത്തിച്ചെങ്കിലും അത് സ്വീകരിക്കാന്‍ ഇവര്‍ തയ്യാറായിരുന്നില്ല. ഇതുമായി ബന്ധപ്പെട്ട് ഗുരുവായൂര്‍ ദേവസ്വത്തിനെതിരെ കത്തില്‍ പരാമര്‍ശങ്ങളുണ്ട്.

കൈപ്പറ്റിയ ആധാരത്തിന് രസീത് നല്‍കാന്‍ അധികൃതര്‍ വിസമ്മതിച്ചതാണ് ഇവരെ മാനസികമായി തളര്‍ത്തിയതെന്ന് കരുതപ്പെടുന്നു.
സംഭവത്തില്‍ വടക്കാഞ്ചേരി പൊലിസ് കേസ് എടുത്ത് അന്വേഷണം ആരംഭിച്ചു.

ശ്രദ്ധിക്കുക: മാനസികമായ പ്രയാസങ്ങള്‍ അനുഭവിക്കുന്നവര്‍ക്കും അതിജീവനത്തിന് സഹായം തേടുന്നവര്‍ക്കുമായി ചുവടെയുള്ള ഹെല്‍പ്പ് ലൈന്‍ നമ്പരുകളില്‍ ബന്ധപ്പെടാവുന്നതാണ്.
ദിശ (DISHA): 1056 
മൈത്രി (MAITHRI): 0484 2540530

One of three elderly sisters died and two remain critical after they consumed poison in Thrissur following a property-related dispute with the Guruvayur Devaswom.