കൊച്ചി: സംസ്ഥാന നിയമസഭാ തിരഞ്ഞെടുപ്പ് പോളിം​ഗ് സമയം അവസാനിച്ചതിന് പിന്നാലെ വോട്ടർമാർക്കും പ്രവർത്തകർക്കും നന്ദി അറിയിച്ച് പ്രതിപക്ഷ നേതാവ് വി.ഡി സതീശൻ. തിരഞ്ഞെടുപ്പ് പ്രഖ്യാപിച്ചത് മുതൽ യുഡിഎഫ് സ്ഥാനാർത്ഥികളുടെ വിജയത്തിനായി രാപ്പകൽ പ്രവർത്തിച്ച ഓരോ നേതാവിനും പ്രവർത്തകനും ഹൃദയാഭിവാദ്യങ്ങൾ അർപ്പിക്കുന്നുവെന്ന് അദ്ദേഹം ഫേസ്ബുക്കിൽ കുറിച്ചു.

രാവിലെ വോട്ട് രേഖപ്പെടുത്തിയ ശേഷം മാധ്യമങ്ങളെ കണ്ട പ്രതിപക്ഷനേതാവ് നൂറിലധികം സീറ്റുകൾ നേടി യുഡിഎഫ് അധികാരത്തിലെത്തുമെന്ന് വിജയപ്രതീക്ഷ പ്രകടിപ്പിച്ചിരുന്നു. പറവൂർ കേസരി ബാലകൃഷ്ണ മെമ്മോറിയൽ ഗവൺമെന്റ് കോളേജിലാണ് അദ്ദേഹം വോട്ട് രേഖപ്പെടുത്തിയത്. കൂടാതെ, എല്ലാവരും ജനാധിപത്യ പ്രക്രിയയിൽ പങ്കാളിയാകണമെന്നും, ആരും വോട്ട് ചെയ്യാതെ മാറിനിൽക്കരുതെന്നും അദ്ദേഹം ആഹ്വാനം ചെയ്തിരുന്നു.

പ്രതിപക്ഷനേതാവിന്റെ കുറിപ്പ്‌

അതേസമയം, നിയമസഭാ തിരഞ്ഞെടുപ്പ് പോളിം​ഗ് സമയം അവസാനിച്ചതിന് പിന്നാലെ മുഖ്യമന്ത്രി പിണറായി വിജയനും വോട്ടർമാർക്ക് നന്ദി അറിയിച്ചിരുന്നു. ഫേസ്ബുക്ക് കുറിപ്പിലൂടെയാണ് മുഖ്യമന്ത്രി വോട്ടർമാർക്ക് നന്ദി അറിയിച്ചത്. കേരളത്തിന്റെ ഉയർന്ന ജനാധിപത്യ ബോധത്തിന്റെയും, നാടിനോടുള്ള ഉന്നതമായ പ്രതിബദ്ധതയുടെയും  തെളിവാണ് ഈ തിരഞ്ഞെടുപ്പെന്ന് മുഖ്യമന്ത്രി വ്യക്തമാക്കി. 

കൂടാതെ, തെരഞ്ഞെടുപ്പ് പ്രക്രിയ വിജയകരമായി പൂർത്തിയാക്കാൻ അഹോരാത്രം പ്രയത്നിച്ച തെരഞ്ഞെടുപ്പ് ഉദ്യോഗസ്ഥർ, സുരക്ഷയൊരുക്കിയ പൊലിസ്-കേന്ദ്രസേനാ അംഗങ്ങൾ, ആരോഗ്യപ്രവർത്തകർ, സന്നദ്ധ പ്രവർത്തകർ തുടങ്ങിയവർക്ക് മുഖ്യമന്ത്രി അഭിനന്ദനം അറിയിച്ചു.