ഒറ്റപ്പാലം: വോട്ട് ചെയ്യാൻ ബൂത്തിലെത്തിയ വയോധികയ്ക്ക് വോട്ടവകാശം നിഷേധിച്ചതായി പരാതി. ഒറ്റപ്പാലം വരോട് 137-ാം നമ്പർ ബൂത്തിൽ വോട്ട് ചെയ്യാനെത്തിയ പുത്തൻവീട്ടിൽ കുഞ്ഞിലക്ഷ്മിക്കാണ് (80) വോട്ട് ചെയ്യാനാവാതെ മടങ്ങിപ്പോകേണ്ടി വന്നത്. 'വീട്ടിലെ വോട്ട്' പദ്ധതി പ്രകാരം നേരത്തെ തന്നെ ഇവർ വോട്ട് ചെയ്തെന്നായിരുന്നു സംഭവത്തിൽ ഉദ്യോ​ഗസ്ഥരുടെ വിശദീകരണം. 

'വീട്ടിലെ വോട്ട്'പദ്ധതിയിൽ ഉൾപ്പെടുത്തിയത് തന്റെ അറിവോടെയല്ലെന്നും, വീട്ടിലെ വോട്ടിനായി അപേക്ഷ നൽകിയിട്ടില്ലെന്നും വയോധിക ആരോപിക്കുന്നു. കൂടാതെ, തന്റെ പേരിൽ മറ്റാരോ വോട്ട് ചെയ്തെന്നും ഇവർ പറയുന്നു. രണ്ടര മണിക്കൂറോളം വോട്ട് ചെയ്യാനായി ഇവർ ബൂത്തിൽ കാത്തുനിന്നെങ്കിലും അധികൃതർ അനുമതി നൽകിയില്ല.

ALSO READ: കണ്ണൂരിൽ മുല്ലക്കൊടിയിൽ സിപിഎം പ്രവർത്തകന് കുത്തേറ്റു

അതേസമയം, വയോധികയ്ക്ക് വോട്ട് നിഷേധിച്ചതോടെ പ്രതിഷേധവുമായി കോൺഗ്രസ് പ്രവർത്തകർ രംഗത്തെത്തി. എന്താണ് വോട്ട് നിഷേധിക്കാൻ കാരണമെന്ന് രേഖാമൂലം എഴുതി നൽകണമെന്ന് കോൺ​ഗ്രസ് പ്രവർത്തകർ ആവശ്യപ്പെട്ടു. തുടർന്ന്, കുഞ്ഞിലക്ഷ്മിയുടെ പേര് വീട്ടിലെ വോട്ട് പട്ടികയിലുള്ളതിനാൽ നേരിട്ട് വോട്ട് ചെയ്യാൻ കഴിയില്ലെന്ന് എഴുതി നൽകി ഉദ്യോ​ഗസ്ഥർ തലയൂരി.