മനാമ: ബഹ്‌റൈനിലെ പൗരന്മാര്‍ താമസിക്കുന്ന ആദ്യ വീടുകളില്‍ ഉപയോഗിക്കുന്ന വൈദ്യുതിയുടെ നിരക്ക് കുറയ്ക്കാന്‍ സര്‍ക്കാര്‍ തീരുമാനിച്ചു. വൈദ്യുതി-ജലകാര്യ മന്ത്രി യാസര്‍ ബിന്‍ ഇബ്രാഹിം ഹുമൈദാന്‍ ഇതുസംബന്ധിച്ച തീരുമാനം ഔദ്യോഗികമായി അറിയിച്ചു.

കാബിനറ്റ് യോഗത്തില്‍ നടത്തിയ വിശദമായ ചര്‍ച്ചകള്‍ക്കുശേഷമാണ് ഈ തീരുമാനമെടുത്തത്. ക്രൗണ്‍ പ്രിന്‍സും പ്രധാനമന്ത്രിയുമായ പ്രിന്‍സ് സല്‍മാന്‍ ബിന്‍ ഹമദ് അല്‍ ഖലിഫയുടെ അധ്യക്ഷതയില്‍ ചേര്‍ന്ന യോഗത്തില്‍, പ്രതിനിധി സഭ അംഗങ്ങള്‍ ഉന്നയിച്ച നിര്‍ദേശങ്ങളും പൗരന്മാരുടെ ആവശ്യങ്ങളും പരിഗണിച്ചാണ് നിരക്ക് കുറയ്ക്കാന്‍ തീരുമാനിച്ചതെന്ന് അധികൃതര്‍ വ്യക്തമാക്കി.

പുതിയ ക്രമീകരണം പ്രകാരം, ആദ്യ വീടുകളില്‍ 5,000 മുതല്‍ 7,000 യൂണിറ്റ് വരെ വൈദ്യുതി ഉപയോഗിക്കുമ്പോള്‍ ഈടാക്കുന്ന നിരക്ക് യൂണിറ്റിന് 32 ഫില്‍സില്‍ നിന്ന് 16 ഫില്‍സായി കുറയ്ക്കും. ഇതോടെ മാസത്തിലുളള വൈദ്യുതി ബില്ലില്‍ ശ്രദ്ധേയമായ കുറവ് ഉണ്ടാകുമെന്നാണ് പ്രതീക്ഷ.

ALSO READ: ഇന്ത്യ-ബഹ്‌റൈന്‍ പ്രതിരോധ സഹകരണം ശക്തിപ്പെടുത്താന്‍ ഉന്നതതല ചര്‍ച്ച

പൗരന്മാരുടെ ജീവിതച്ചെലവ് കുറയ്ക്കുക എന്ന ലക്ഷ്യത്തോടെയാണ് നിരക്കില്‍ ഇളവ് അനുവദിച്ചതെന്ന് മന്ത്രി യാസര്‍ ഹുമൈദാന്‍ പറഞ്ഞു. അതേസമയം, വൈദ്യുതിയും ജലവിതരണവും കാര്യക്ഷമമായി തുടരുന്നതിനുള്ള നടപടികളും സര്‍ക്കാര്‍ ഒരുപോലെ നടപ്പാക്കുമെന്നും അദ്ദേഹം കൂട്ടിച്ചേര്‍ത്തു.

ഈ പുതിയ വൈദ്യുതി നിരക്ക് ജനുവരി ഒന്നുമുതല്‍ പൗരന്മാരുടെ ആദ്യ താമസവസതികളിലെ ബില്ലുകള്‍ക്ക് ബാധകമാകും.

Bahrain has reduced electricity tariffs for citizens’ first residential homes as part of measures to ease cost-of-living pressures, the Electricity and Water Affairs Minister announced.