ദുബൈ: ലോകത്തെ വീണ്ടും ഞെട്ടിക്കുന്ന ഗതാഗത വിപ്ലവത്തിനൊരുങ്ങുകയാണ് ദുബൈ. നഗരത്തിലെ പ്രധാന മേഖലകളിലെ തിരക്ക് കുറയ്ക്കാനും യാത്രാസൗകര്യം മെച്ചപ്പെടുത്താനും ലക്ഷ്യമിട്ട് 'ഗ്ലൈഡ്‌വേയ്‌സ്' (Glydways) എന്ന അത്യാധുനിക ഓട്ടോണമസ് ഓട്ടോമേറ്റഡ് ട്രാന്‍സിറ്റ് നെറ്റ്‌വര്‍ക്ക് ദുബൈ ആര്‍.ടി.എ അവതരിപ്പിക്കുന്നു. ഡ്രൈവറില്ലാത്ത, പരിസ്ഥിതി സൗഹൃദമായ ഈ കുഞ്ഞന്‍ വാഹനങ്ങള്‍ നാല് മാസത്തിനുള്ളില്‍ പരീക്ഷണ ഓട്ടം ആരംഭിക്കും.
മദീനത് ജുമൈറയില്‍ നടക്കുന്ന ലോക ഗവണ്‍മെന്റ് ഉച്ചകോടിക്കിടെ ഗ്ലൈഡ്‌വേയ്‌സ് സി.ഇ.ഒ മാര്‍ക്ക് സീഗറാണ് ഇക്കാര്യം വ്യക്തമാക്കിയത്. സാന്‍ ഫ്രാന്‍സിസ്‌കോ ആസ്ഥാനമായുള്ള ഗതാഗത സാങ്കേതിക കമ്പനിയാണ് ഈ ഓണ്‍ഡിമാന്‍ഡ് യാത്രാ സംവിധാനം വികസിപ്പിച്ചെടുത്തിരിക്കുന്നത്.

 

 

ആദ്യ ഘട്ടത്തില്‍ നാല് റൂട്ടുകള്‍

ദുബൈയിലെ നാല് പ്രധാന റൂട്ടുകളിലാണ് നിലവില്‍ ഗ്ലൈഡ്‌വേയ്‌സ് പദ്ധതി ആസൂത്രണം ചെയ്തിരിക്കുന്നത്:
1: ബ്ലൂവാട്ടേഴ്‌സ് ഐലന്‍ഡ്: നാഷണല്‍ പെയിന്റ്‌സ് മെട്രോ സ്റ്റേഷന്‍ മുതല്‍ ബ്ലൂവാട്ടേഴ്‌സ് വരെ (2.8 കിലോമീറ്റര്‍)  ഇവിടെയാണ് ആദ്യ പരീക്ഷണ ഓട്ടം നടക്കുക.
2: ഉമ്മു സുഖീം: മാള്‍ ഓഫ് എമിറേറ്റ്‌സ് മെട്രോ സ്റ്റേഷനെ മദീനത് ജുമൈറയുമായി ബന്ധിപ്പിക്കുന്നു (1.9 കിലോമീറ്റര്‍).
3: അല്‍ ഖൂസ്: ഓണ്‍പാസീവ് സ്റ്റേഷനില്‍ നിന്ന് അല്‍ സിര്‍കാല്‍ അവന്യൂ, ടൈംസ് സ്‌ക്വയര്‍ സെന്റര്‍ എന്നിവിടങ്ങളിലേക്ക് (2.6 കിലോമീറ്റര്‍).
4: ദുബൈ ഫെസ്റ്റിവല്‍ സിറ്റി: ഈ മേഖലയിലെ ഗതാഗതം സുഗമമാക്കുന്നതിനൊപ്പം ഭാവിയില്‍ മെട്രോ ബ്ലൂ ലൈനുമായി (7 കിലോമീറ്റര്‍) ഇതിനെ ബന്ധിപ്പിക്കും.

സവിശേഷതകള്‍ ഏറെ

അമേരിക്കയിലും ഏഷ്യയിലുമായി നിരവധി രാജ്യങ്ങള്‍ ഈ സാങ്കേതികവിദ്യ നടപ്പിലാക്കാന്‍ ഒരുങ്ങുകയാണ്. ദുബൈയുടെ സ്മാര്‍ട്ട് സിറ്റി ലക്ഷ്യങ്ങളിലേക്കുള്ള വലിയൊരു ചുവടുവെപ്പായി ഗ്ലൈഡ്‌വേയ്‌സ് മാറും.

* വേഗതയും ശേഷിയും: പൂര്‍ണ്ണമായും ഇലക്ട്രിക് വാഹനങ്ങളായ ഇവയ്ക്ക് മണിക്കൂറില്‍ 50 കിലോമീറ്റര്‍ വേഗതയുണ്ടാകും. ഒരു വാഹനത്തില്‍ 4 മുതല്‍ 6 വരെ യാത്രക്കാര്‍ക്ക് സഞ്ചരിക്കാം.
* ദൂരപരിധി: ഒറ്റ ചാര്‍ജില്‍ 250 കിലോമീറ്റര്‍ വരെ സഞ്ചരിക്കാന്‍ സാധിക്കും.
* മികച്ച യാത്രാനുഭവം: 24 മണിക്കൂറും ആവശ്യാനുസരണം ലഭ്യമാകുന്ന ഈ സേവനത്തില്‍ ഇടയ്ക്ക് സ്റ്റോപ്പുകള്‍ ഉണ്ടാകില്ല. ഒരു ട്രെയിനിന്റെ ശേഷിയും സ്വകാര്യ കാറിന്റെ സൗകര്യവും ഇതില്‍ ലഭിക്കും.
* മിതമായ നിരക്ക്: മെട്രോ, ബസ് ടിക്കറ്റ് നിരക്കില്‍ തന്നെ ഈ അത്യാധുനിക സേവനം ലഭ്യമാകും. നോല്‍ (Nol) കാര്‍ഡ് ഉപയോഗിച്ചോ ഫോണ്‍ വഴിയോ പണമടയ്ക്കാം. ആപ്പ് അല്ലെങ്കില്‍ കിയോസ്‌കുകള്‍ വഴി വാഹനം ബുക്ക് ചെയ്യാം.

ചെലവ് കുറവ്, കാര്യക്ഷമത കൂടുതല്‍

ഒരു ബൈക്ക് പാതയുടെ മാത്രം വീതിയുള്ള (രണ്ട് മീറ്റര്‍) ട്രാക്കുകളിലൂടെ മണിക്കൂറില്‍ 10,000 യാത്രക്കാരെ കൊണ്ടുപോകാന്‍ ഈ സംവിധാനത്തിന് കഴിയും. നിര്‍മ്മാണ ചെലവില്‍ 90 ശതമാനവും പ്രവര്‍ത്തന ചെലവില്‍ 70 ശതമാനവും ലാഭിക്കാന്‍ ഇതിലൂടെ സാധിക്കുമെന്നും മാര്‍ക്ക് സീഗര്‍ പറഞ്ഞു. ആദ്യമായാണ് സബ്‌സിഡികള്‍ ആവശ്യമില്ലാത്ത ഇത്രയും ലാഭകരമായ പൊതുഗതാഗത സംവിധാനം വരുന്നത്.

ALSO READ: സഊദിയില്‍ ഒട്ടകങ്ങള്‍ക്കും ഇനി 'പാസ്‌പോര്‍ട്ട്'; വിപ്ലവകരമായ നീക്കവുമായി മന്ത്രാലയം

Summary: Dubai’s Roads and Transport Authority (RTA) is set to introduce Glydways, a next-generation autonomous automated transit network designed to ease congestion and provide point-to-point travel in key areas.
Launch Timeline: Pilot testing for the first phase is scheduled to begin within the next four months, with operations expected by the end of the year.
The Technology: Developed by a San Francisco-based company, these are all-electric, driverless vehicles that carry 4–6 passengers. They travel at 50 km/h with a range of 250 km on a single charge.