റിയാദ്: സഊദി പ്രൊ ലീഗ് ക്ലബ് അൽ നസ്‌റുമായുള്ള അസ്വാരസ്യത്തിൽ ക്രിസ്റ്റ്യാനോ റൊണാൾഡോക്ക് മുന്നറിയിപ്പുമായി ക്ലബ്. കുറച്ചു ദിവസമായി നടക്കുന്ന വിവാദങ്ങൾക്ക് പിന്നാലെയാണ് ക്ലബിന്റെ പ്രസ്ഥാവന. ഒരു കളിക്കാരനും ക്ലബിന് മുകളിലല്ലെന്നും എല്ലാവരും കളിക്കാർ മാത്രമാണ്, ആർക്കും പ്രത്യേക പരഗണന ഇല്ല, അൽ നസ്‌റ് മുന്നറിയിപ്പ് നൽകിയതായി അന്താരാഷ്ട്ര മാധ്യമങ്ങൾ റിപ്പോർട്ട് ചെയത്ു. നിലവിൽ 2027 വരെ താരത്തിന് ക്ലബ്ബുമായി കരാർ ഉണ്ടെങ്കിലും ലീഗിന്റെ നടത്തിപ്പുമായി ബന്ധപ്പെട്ട പല കാര്യങ്ങളിലും ക്രിസ്റ്റ്യാനോയ്ക്ക് അഭിപ്രായവ്യത്യാസം ഉണ്ടെന്നും ഇതു രൂക്ഷമായതോടെ താരം ക്ലബ് വിടാൻ ആലോചിക്കുന്നതായും സഊദി മാധ്യമങ്ങൾ റിപ്പോർട്ട് ചെയ്തു.

അൽ നസ്‌റിന്റെ കഴിഞ്ഞ ലീഗ് മത്സരത്തിൽ ക്രിസ്റ്റ്യാനോ കളിച്ചിരുന്നില്ല. പിന്നാലെ ടീമിന്റെ പരിശീലന സെഷനിൽ നിന്നും നാൽപത്തിയൊന്നുകാരൻ താരം വിട്ടുനിന്നു. ഇതോടെയാണ് താരം ടീം വിട്ടേക്കുമെന്ന അഭ്യൂഹം ശക്തമായത്. ലീഗിന്റെ സാമ്പത്തിക കാര്യങ്ങൾ നിയന്ത്രിക്കുന്ന പബ്ലിക് ഇൻവെസ്റ്റ്‌മെന്റ് ഫണ്ട് (പി.ഐ.എഫ്) അൽ നസ്‌റിനോടു പക്ഷപാതം കാട്ടുന്നതായും ടീമിലേക്ക് പുതിയ താരങ്ങളെ കൊണ്ടുവരാൻ അനുവദിക്കുന്നില്ലെന്നും ക്രിസ്റ്റ്യാനോ പരാതിപ്പെട്ടതായാണ് വിവരം. ഇത് ലീഗ് സംഘാടകരെ ചൊടിപ്പിച്ചു.ക്രിസ്റ്റ്യാനോ വെറുമൊരു താരമാണെന്നും ലീഗിന്റെ നടത്തിപ്പിൽ ഇടപെടേണ്ടതില്ലെന്നും സൗദി പ്രൊ ലീഗ് അധികൃതർ കഴിഞ്ഞ ദിവസം പറഞ്ഞിരുന്നു. ഇതോടെയാണ് കാര്യങ്ങൾ വഷളായത്.