മസ്‌കത്ത്: ഒമാന്റെ വിവിധ ഭാഗങ്ങളില്‍ അടുത്ത ദിവസങ്ങളില്‍ ശക്തമായ മഴയ്ക്കും ഇടിമിന്നലിനും സാധ്യതയുണ്ടെന്ന് ഒമാന്‍ കാലാവസ്ഥാ നിരീക്ഷണ കേന്ദ്രം അറിയിച്ചു. വടക്കന്‍ അല്‍ ബാത്തിന, ബുറൈമി, മുസന്ദം, ദാഹിറ എന്നീ ഗവര്‍ണറേറ്റുകളിലാണ് മഴയുടെ ആഘാതം കൂടുതലായി അനുഭവപ്പെടുക. 

അറേബ്യന്‍ ഗള്‍ഫില്‍ രൂപപ്പെട്ട ന്യൂനമര്‍ദ്ദത്തിന്റെ ഫലമായി ഫെബ്രുവരി 8 മുതല്‍ 11 വരെ ഒമാന്റെ വടക്കന്‍ മേഖലകളില്‍ മഴ നീണ്ടുനില്‍ക്കും. ചില പ്രദേശങ്ങളില്‍ മണിക്കൂറില്‍ 30 മുതല്‍ 50 കിലോമീറ്റര്‍ വരെ വേഗതയില്‍ കാറ്റുവീശാന്‍ സാധ്യതയുണ്ട്. 

പൊടിപടലങ്ങള്‍ ഉയരുന്നത് കാരണം ദൂരക്കാഴ്ച കുറയാന്‍ സാധ്യതയുള്ളതിനാല്‍ വാഹനയാത്രികര്‍ ജാഗ്രത പാലിക്കണം.
ഒമാന്‍ കടലിലും മുസന്ദം തീരങ്ങളിലും തിരമാലകള്‍ 2 മുതല്‍ 3 മീറ്റര്‍ വരെ ഉയരാന്‍ സാധ്യതയുണ്ടെന്ന് കാലാവസ്ഥാ കേന്ദ്രം അറിയിച്ചു. ഇതിനെ തുടര്‍ന്ന്  മത്സ്യത്തൊഴിലാളികളും വിനോദസഞ്ചാരികളും കടലില്‍ ഇറങ്ങരുതെന്ന് മുന്നറിയിപ്പുണ്ട്.

മഴയെത്തുടര്‍ന്ന് ഒമാനിലെ ഭൂരിഭാഗം സ്ഥലങ്ങളിലും തണുപ്പ് വര്‍ദ്ധിക്കും. മസ്‌കത്തില്‍ ശരാശരി താപനില 18°C നും 24°C നും ഇടയിലായിരിക്കും. ജബല്‍ അഖ്ദര്‍ ഉള്‍പ്പെടെയുള്ള മലനിരകളില്‍ താപനില 5°C ന് താഴെയാകാന്‍ സാധ്യതയുണ്ട്.

ALSO READ: പ്രവാസികള്‍ക്ക് കനത്ത തിരിച്ചടി; ഒമാനില്‍ പുതിയ തൊഴില്‍ നിയന്ത്രണങ്ങള്‍

താഴ്ന്ന പ്രദേശങ്ങളിലും വാദികളിലും താമസിക്കുന്നവര്‍ പ്രത്യേകം ശ്രദ്ധിക്കണമെന്ന് സിവില്‍ ഡിഫന്‍സ് ആന്‍ഡ് ആംബുലന്‍സ് അതോറിറ്റി അറിയിച്ചു. വാദികള്‍ മുറിച്ചുകടക്കാന്‍ ശ്രമിക്കരുത്. യാത്രക്കാര്‍ കാലാവസ്ഥാ അപ്‌ഡേറ്റുകള്‍ ശ്രദ്ധിക്കുകയും സുരക്ഷാ നിര്‍ദ്ദേശങ്ങള്‍ കര്‍ശനമായി പാലിക്കുകയും ചെയ്യണം.

Oman’s Meteorology and Civil Defence authorities have issued a weather warning as heavy rain, strong winds, and potential flash floods are expected across several governorates. Residents and travellers are advised to stay alert and avoid wadis and low-lying areas.