തിരുവനന്തപുരം: വരും ദിവസങ്ങളില്‍ കേരളത്തില്‍ പൊതുവെ വരണ്ട കാലാവസ്ഥയായിരിക്കും അനുഭവപ്പെടുകയെന്ന കേന്ദ്ര കാലാവസ്ഥ വകുപ്പിന്റെ അറിയിപ്പ്. സംസ്ഥാനത്ത് ചൂട് കൂടുമെന്നും അറിയിപ്പില്‍ വ്യക്തമാക്കുന്നു.  കഴിഞ്ഞ ദിവസങ്ങളില്‍ ചിലയിടങ്ങളില്‍ ലഭിച്ച മഴക്ക് ശമനമാകും. അടുത്ത നാല് ദിവസത്തേക്ക് ഒരു ജില്ലയിലും പ്രത്യേക ശക്തമായ മഴ മുന്നറിയിപ്പുകളൊന്നും നല്‍കിയിട്ടില്ല. അതേ സമയം, തിരുവനന്തപുരം കൊല്ലം ജില്ലകളില്‍ നേരിയ മഴക്ക് സാധ്യതയുണ്ടെന്നും അറിയിപ്പില്‍ പറയുന്നു. 

അന്തരീക്ഷം വരണ്ടതാകുന്നതോടെ പകല്‍ സമയങ്ങളില്‍ ചൂട് കൂടാന്‍ സാധ്യതയുണ്ടെന്നാണ് അറിയിപ്പിലുള്ളത്.  സംസ്ഥാനത്ത് പകല്‍ താപനില സാധാരണയേക്കാള്‍ രണ്ട് ഡിഗ്രി മുതല്‍ നാല് ഡിഗ്രി വരെ ഉയര്‍ന്ന നിലയിലാണ് ഇപ്പോള്‍. വരും ദിവസങ്ങളില്‍ താപനില 34 ഡിഗ്രി മുതല്‍ 37ഡിഗ്രി വരെ ഉയരാന്‍ സാധ്യതയുണ്ടെന്നും കാലാവസ്ഥാ വകുപ്പിന്റെ പ്രവചനത്തില്‍ വ്യക്തമാക്കുന്നു. ജാഗ്രത പാലിക്കണമെന്നും നിര്‍ദേശമുണ്ട്.

ALSO READ: ജനുവരിയില്‍ അധികമഴ കിട്ടി: ഫെബ്രുവരിയില്‍ കേരളത്തില്‍ ചൂട് കൂടും

കോട്ടയം, എറണാകുളം, പാലക്കാട്, തൃശൂര്‍ ജില്ലകളില്‍ രാത്രികാല താപനിലയും ഉയര്‍ന്നുതന്നെ തുടരുകയാണ്. അന്തരീക്ഷ താപനില ഉയരുന്ന സാഹചര്യത്തില്‍ ഉച്ചസമയങ്ങളില്‍ നേരിട്ട് വെയിലേല്‍ക്കുന്നത് ഒഴിവാക്കാനും നിര്‍ജ്ജലീകരണം തടയാന്‍ ധാരാളം വെള്ളം കുടിക്കാനും ആരോഗ്യ വിദഗ്ധര്‍ നിര്‍ദ്ദേശിക്കുന്നുണ്ട്.

എന്നാല്‍ കേരള - കര്‍ണാടക - ലക്ഷദ്വീപ് തീരങ്ങളില്‍ ഇന്ന് മത്സ്യബന്ധനത്തിന് തടസമില്ലെന്ന് കാലാവസ്ഥാ വകുപ്പ് അറിയിച്ചു. പ്രത്യേക ജാഗ്രതാ നിര്‍ദ്ദേശങ്ങളൊന്നും നിലവിലില്ലെന്നും വ്യക്തമാക്കുന്നു. 

imd forecasts dry weather across kerala in the coming days with temperatures likely to rise up to 37 degree celsius, while light rain is possible in thiruvananthapuram and kollam.