കോഴിക്കോട്: നാള്‍ക്കുനാള്‍ വര്‍ദ്ധിച്ചുവരുന്ന വാഹനാപകടങ്ങളില്‍ ആശങ്ക രേഖപ്പെടുത്തി സമസ്ത കേരള ജംഇയ്യത്തുല്‍ ഉലമ നൂറാം വാര്‍ഷിക സമ്മേളനം. ഗതാഗതമര്യാദകള്‍ പാലിക്കാന്‍ സമൂഹത്തിന് വലിയ ബാധ്യതയുണ്ടെന്നും മുസ്ലിം സമൂഹം ഇക്കാര്യത്തില്‍ മാതൃകയാകണമെന്നും സമ്മേളനം അംഗീകരിച്ച പ്രമേയത്തില്‍ വ്യക്തമാക്കുന്നു.

വഴിയിലെ തടസ്സങ്ങള്‍ നീക്കുന്നതും പാതയോടുള്ള അവകാശങ്ങള്‍ പാലിക്കുന്നതും വിശ്വാസത്തിന്റെ (ഈമാന്‍) ഭാഗമാണെന്ന് പ്രമേയം ഓര്‍മ്മിപ്പിച്ചു. അനാവശ്യമായി വാഹനങ്ങള്‍ നിരത്തിലിറക്കിയും സാഹസിക പ്രകടനം നടത്തിയും ഗതാഗത തടസ്സമുണ്ടാക്കുന്നത് വിശ്വാസത്തിന് നിരക്കാത്ത കാര്യമാണ്. ഓരോ വ്യക്തിയും ആവശ്യമായ ട്രാന്‍സ്‌പോര്‍ട്ട് എത്തിക്‌സും മര്യാദകളും പാലിക്കണമെന്ന് സമ്മേളനം ഗൗരവപൂര്‍വ്വം ആഹ്വാനം ചെയ്തു.

കോട്ടുമല മൊയ്തീന്‍കുട്ടി മുസ്‌ലിയാര്‍ പ്രമേയം അവതരിപ്പിച്ചു. കെ.ടി. ഹംസ മുസ്‌ലിയാര്‍ ഇതിനെ പിന്താങ്ങി. കേരളത്തിലെ വര്‍ദ്ധിച്ചുവരുന്ന റോഡ് അപകടങ്ങളുടെ പശ്ചാത്തലത്തില്‍ വിശ്വാസികള്‍ സ്വയം അച്ചടക്കം പാലിക്കണമെന്ന സന്ദേശമാണ് ഈ പ്രമേയത്തിലൂടെ സംഘടന നല്‍കുന്നത്.