കുവൈത്ത് സിറ്റി: സമുദ്രമാര്‍ഗ്ഗം മയക്കുമരുന്ന് കടത്താന്‍ ശ്രമിച്ച അഞ്ച് പ്രവാസികള്‍ക്ക് കുവൈത്ത് അപ്പീല്‍ കോടതി വധശിക്ഷ വിധിച്ചു. ജഡ്ജി ഡോ. ഫഹദ് ബു സ്വാലിബ് അധ്യക്ഷനായ കോടതിയാണ് കര്‍ശനമായ ശിക്ഷാവിധി പുറപ്പെടുവിച്ചത്. രാജ്യത്തിന്റെ സുരക്ഷയ്ക്കും പൊതുജനാരോഗ്യത്തിനും ഭീഷണിയാകുന്ന ലഹരി മാഫിയക്കെതിരെയുള്ള ശക്തമായ നടപടിയായാണ് ഈ വിധി വിലയിരുത്തപ്പെടുന്നത്. വധശിക്ഷയ്ക്ക് വിധിക്കപ്പെട്ട അഞ്ചുപേരും ഇറാന്‍ പൗരന്‍മാരാണ്.

ഇറാനില്‍ നിന്ന് ബോട്ടില്‍ വന്‍തോതില്‍ മയക്കുമരുന്ന് കയറ്റി കുവൈത്തിലേക്ക് കടക്കാന്‍ ശ്രമിക്കവെയാണ് പ്രതികള്‍ പിടിയിലായത്. മുന്‍കൂട്ടി നിശ്ചയിച്ചതനുസരിച്ച് കുവൈത്ത് സ്വദേശിക്ക് ലഹരിമരുന്ന് കൈമാറാനായിരുന്നു ഇവരുടെ പദ്ധതിയെന്ന് കോടതി രേഖകള്‍ വ്യക്തമാക്കുന്നു. പ്രതികള്‍ കുറ്റം സമ്മതിക്കുകയും ചെയ്തു.

മയക്കുമരുന്നുമായി കുവൈത്ത് സമുദ്രപരിധിയില്‍ പ്രവേശിച്ച ഉടന്‍ തന്നെ കോസ്റ്റ് ഗാര്‍ഡ് പട്രോളിംഗ് സംഘം ബോട്ട് തടയുകയായിരുന്നു. ഉദ്യോഗസ്ഥരുടെ നിര്‍ദ്ദേശം മറികടന്ന് രക്ഷപ്പെടാന്‍ ശ്രമിച്ചെങ്കിലും ബോട്ട് വളഞ്ഞ് പ്രതികളെ കീഴ്‌പ്പെടുത്തി. ബോട്ടില്‍ നിന്ന് ലഹരിമരുന്ന് ശേഖരം കണ്ടെടുത്തു. ലഹരിമരുന്ന് കടത്തുക എന്ന ലക്ഷ്യത്തോടെ തന്നെയാണ് തങ്ങള്‍ യാത്ര തിരിച്ചതെന്ന് പ്രതികള്‍ കോടതിയില്‍ സമ്മതിച്ചു.

മയക്കുമരുന്ന് കേസുകളില്‍ വിട്ടുവീഴ്ചയില്ലാത്ത സമീപനമാണ് കുവൈത്ത് ജുഡീഷ്യറി സ്വീകരിക്കുന്നത് എന്നതിന്റെ ഉദാഹരണമാണ് ഈ വിധി. കുവൈത്തില്‍ സമീപകാലത്ത് റിപ്പോര്‍ട്ട് ചെയ്യപ്പെട്ട ഏറ്റവും വലിയ ലഹരിവേട്ടകളില്‍ ഒന്നാണിത്.

The Court of Appeal has upheld the death sentences handed down by a criminal court to five Iranian citizens in a case involving the smuggling of a large amount of drugs to Kuwait by sea.