ദോഹ: രാജ്യത്തെ ഭക്ഷ്യസുരക്ഷാ ലക്ഷ്യങ്ങൾ കൈവരിക്കുന്നതിനും ആധുനിക കൃഷിരീതികൾ പ്രോത്സാഹിപ്പിക്കുന്നതിനുമായി നഗരസഭാ മന്ത്രാലയം 'സുസ്ഥിര കാർഷിക ഉൽപ്പാദന പുരസ്‌കാരം' പ്രഖ്യാപിച്ചു. നഗരസഭാ മന്ത്രി അബ്ദുല്ല ബിൻ ഹമദ് ബിൻ അബ്ദുല്ല അൽ അതിയ്യയാണ് പുരസ്‌കാരം പ്രഖ്യാപിച്ചത്. ആധുനിക സാങ്കേതികവിദ്യകൾ ഉപയോഗിക്കുന്ന കർഷകർ, കന്നുകാലി വളർത്തുന്നവർ, മത്സ്യത്തൊഴിലാളികൾ എന്നിവരെ അംഗീകരിക്കുക, പ്രാദേശിക ഉൽപ്പാദനത്തിന്റെ ഗുണമേന്മ വർദ്ധിപ്പിക്കുക, കാർഷിക മേഖലയിൽ സുസ്ഥിര വികസനം ഉറപ്പാക്കുക തുടങ്ങിയവയാണ് ലക്ഷ്യമിടുന്നത്.

ALSO READ: റമദാൻ വിപണിയിൽ പരിശോധന ശക്തമാക്കി സഊദി മന്ത്രാലയം; പൂഴ്ത്തിവെപ്പും അമിതവിലയും തടയാൻ കർശന നടപടി

ഖത്തർ നാഷനൽ വിഷൻ 2030ന്റെ ഭാഗമാണ് ഈ ലക്ഷ്യങ്ങൾ. ഇതുപ്രകാരം പച്ചക്കറി കൃഷി, ഈന്തപ്പഴ കൃഷി, കന്നുകാലി വളർത്തൽ, മത്സ്യ ഉൽപ്പാദനം എന്നീ നാല് വിഭാ​ഗങ്ങളിലായാണ് അവാർഡ് നൽകുന്നത്. 2026 ഏപ്രിലിൽ അവാർഡ് വെബ്സൈറ്റ് ലോഞ്ച് ചെയ്യുകയും നാമനിർദ്ദേശങ്ങൾ സ്വീകരിച്ചു തുടങ്ങുകയും ചെയ്യുമെന്ന് അഗ്രികൾച്ചർ ആന്റ് ഫുഡ് സെക്യൂരിറ്റി അസിസ്റ്റന്റ് അണ്ടർസെക്രട്ടറി എൻജിനീയർ ഫഹദ് മുഹമ്മദ് അൽ ഖഹ്താനി വ്യക്തമാക്കി. വിജയികൾക്ക് 2027ലെ അഗ്രിടെക് വേദിയിൽ വച്ച് പുരസ്കാരങ്ങൾ സമ്മാനിക്കും. ആധുനിക സാങ്കേതിക വിദ്യയുടെ ഉപയോഗം, ബയോസെക്യൂരിറ്റി, കീടനാശിനി വിമുക്തമായ ഉൽപ്പന്നങ്ങൾ, മികച്ച ഫാം മാനേജ്‌മെന്റ് തുടങ്ങിയ മാനദണ്ഡങ്ങൾ അടിസ്ഥാനമാക്കിയായിരിക്കും അവാർഡ് ജേതാക്കളെ തിരഞ്ഞെടുക്കുന്നത്.

Qatar's Ministry of Municipality launches the "Sustainable Agricultural Production Award" to honor farmers and food producers. Nominations for the four categories begin in April 2026, aiming to boost national food security and sustainability.