കോഴിക്കോട്: ഭക്ഷണത്തിന് ചൂടില്ലെന്നാരോപിച്ച് ഹോട്ടലില്‍ യുവാവിന്റെ അഴിഞ്ഞാട്ടം. കോഴിക്കോട് പുറമേരിയിലെ ബിരിയാണി ഡേയ്‌സ് എന്ന ഹോട്ടലിന് നേരെയാണ് ആക്രമണമുണ്ടായത്. തടയാന്‍ ശ്രമിച്ച ഹോട്ടല്‍ ഉടമ വെള്ളികുളങ്ങര സ്വദേശി സാദിഖിന് മര്‍ദനമേറ്റു.

തിങ്കളാഴ്ച വൈകീട്ട് ഏഴുമണിയോടെയാണ് സംഭവം നടന്നത്. ഹോട്ടലിലെത്തിയ യുവാവ് പൊറോട്ടയും ബീഫ് റോസ്റ്റും ഓര്‍ഡര്‍ ചെയ്തിരുന്നു. എന്നാല്‍ വിളമ്പിയ പൊറോട്ടയ്ക്ക് ചൂടില്ലെന്നും ഭക്ഷണത്തിന് രുചിയില്ലെന്നും പറഞ്ഞ് ഇയാള്‍ ഉടമയുമായി തര്‍ക്കത്തിലായി.

ഭക്ഷണം മാറ്റിക്കൊടുക്കാമെന്നോ അല്ലെങ്കില്‍ പണം തിരികെ നല്‍കിക്കൊള്ളാമെന്നോ ഉടമ അറിയിച്ചെങ്കിലും യുവാവ് ശാന്തനായില്ല. പുറത്തേക്ക് പോയ യുവാവ് പിന്നീട് തിരിച്ചെത്തി ഹോട്ടലിന്റെ മുന്‍വശത്തെ ചില്ലുകള്‍ അടിച്ചു തകര്‍ക്കുകയായിരുന്നു. തടയാന്‍ ശ്രമിച്ച സാദിഖിനെ വെള്ളക്കുപ്പി കൊണ്ട് അടിക്കുകയും പിടിച്ചുതള്ളുകയും ചെയ്തു.

ALSO READ: എംപ്ലോയ്മെന്റ് എക്സ്ചേഞ്ച്; ശമ്പളം മലബാറിൽ, സേവനം തിരുവനന്തപുരത്ത്

മര്‍ദ്ദനമേറ്റതിനെത്തുടര്‍ന്ന് ശാരീരിക അസ്വസ്ഥത അനുഭവപ്പെട്ട ഉടമ സാദിഖ് ആശുപത്രിയില്‍ ചികിത്സ തേടി. സംഭവത്തില്‍ പരാതി ലഭിച്ചതിനെത്തുടര്‍ന്ന് പൊലിസ് അന്വേഷണം ആരംഭിച്ചിട്ടുണ്ട്.

A youth vandalized 'Biriyani Days' hotel in Purameri and assaulted its owner after complaining that the porotta served to him lacked sufficient heat and taste.