കൊല്ലം: വിഴിഞ്ഞത്തെ റസ്റ്റോറന്റില്‍ നിന്ന് ഭക്ഷണം കഴിച്ചതിന് പിന്നാലെ ശാരീരിക അസ്വസ്ഥതകള്‍ അനുഭവപ്പെട്ട രണ്ടുപേര്‍ മരിച്ചു. നിലമേല്‍ പ്ലാച്ചിയോട് സ്വദേശിനി റഷീദ ബീവി (58), മരുമകന്‍ ഷാജി (48) എന്നിവരാണ് മരിച്ചത്. റഷീദ ബീവിയുടെ മകള്‍ സജി മോള്‍ നിലവില്‍ പാരിപ്പള്ളി മെഡിക്കല്‍ കോളജ് ആശുപത്രിയില്‍ ചികിത്സയിലാണ്.

കഴിഞ്ഞ ദിവസം വിഴിഞ്ഞത്തെ ഒരു റസ്റ്റോറന്റില്‍ നിന്ന് അഞ്ചംഗ സംഘം മീന്‍ വിഭവങ്ങള്‍ കഴിച്ചിരുന്നു.മടക്കയാത്രയ്ക്കിടെ സംഘത്തിലുണ്ടായിരുന്നവര്‍ക്ക് ചര്‍ദ്ദിയും ദേഹാസ്വാസ്ഥ്യവും അനുഭവപ്പെട്ടു. ഉടന്‍ തന്നെ ഇവരെ നിലമേലിലെ സ്വകാര്യ ആശുപത്രിയില്‍ പ്രവേശിപ്പിച്ചു.

നില വഷളായതിനെത്തുടര്‍ന്ന് മെഡിക്കല്‍ കോളജിലേക്ക് മാറ്റിയെങ്കിലും ഷാജിയും റഷീദ ബീവിയും മരണത്തിന് കീഴടങ്ങി. ഷാജിയെ തിരുവനന്തപുരം മെഡിക്കല്‍ കോളജിലെത്തിക്കുമ്പോഴേക്കും മരണം സംഭവിച്ചിരുന്നു. ഷാജിക്ക് നേരത്തെ തന്നെ അലര്‍ജി സംബന്ധമായ പ്രശ്‌നങ്ങള്‍ ഉണ്ടായിരുന്നുവെന്നും ഭക്ഷണത്തില്‍ നിന്നുള്ള അലര്‍ജിയാണ് മരണ കാരണമെന്നുമാണ് പ്രാഥമിക നിഗമനം.

ALSO READ: പൊറോട്ടയ്ക്ക് ചൂടില്ലെന്ന് പരാതി; കോഴിക്കോട് ഹോട്ടല്‍ അടിച്ചുതകര്‍ത്തു, ഉടമയ്ക്ക് മര്‍ദ്ദനം

മരണം ഭക്ഷ്യവിഷബാധ മൂലമാണെന്ന ബന്ധുക്കളുടെ പരാതിയെത്തുടര്‍ന്ന് പൊലിസ് ഇടപെട്ട് വിഴിഞ്ഞത്തെ ഹോട്ടല്‍ താല്‍ക്കാലികമായി അടപ്പിച്ചു. ഭക്ഷ്യസുരക്ഷാ വകുപ്പ് ഹോട്ടലില്‍ വിശദമായ പരിശോധന നടത്തും. സജി മോളുടെ ആരോഗ്യനില നിലവില്‍ തൃപ്തികരമാണ്.

A mother-in-law and her son-in-law died due to severe physical discomfort and suspected allergic reactions after eating fish dishes from a restaurant in Vizhinjam.