അബുദബി: മേഘങ്ങളിലേക്ക് രാസവസ്തുക്കൾ വിതറി മഴ പെയ്യിക്കുന്ന പരമ്പരാഗത രീതിക്ക് പകരമായി, അത്യാധുനിക ലേസർ സാങ്കേതികവിദ്യയുമായി യുഎഇ. മഴ ത്വരിതപ്പെടുത്തുന്നതിന് ലേസർ രശ്മികൾ ഉപയോഗിക്കാമെന്ന പരീക്ഷണം വിജയകരമായതോടെ, അന്താരാഷ്ട്ര പങ്കാളികളുമായി ചേർന്ന് ഫീൽഡ് ട്രയലുകൾക്ക് ഒരുങ്ങുകയാണ് രാജ്യം. അബുദബിയിലെ ടെക്നോളജി ഇന്നൊവേഷൻ ഇൻസ്റ്റിറ്റ്യൂട്ട് (TII) ആണ് ഈ നൂതന പദ്ധതിക്ക് നേതൃത്വം നൽകുന്നത്. ലേസർ ഉപയോഗിച്ച് അന്തരീക്ഷത്തിലെ ജലബാഷ്പം ഘനീഭവിപ്പിക്കാമെന്ന് ലബോറട്ടറി പരീക്ഷണങ്ങളിലൂടെ ശാസ്ത്രജ്ഞർ സ്ഥിരീകരിച്ചു കഴിഞ്ഞു.

നിലവിൽ ലോകമെങ്ങും ഉപയോഗിക്കുന്ന 'ക്ലൗഡ് സീഡിംഗ്' രീതിയിൽ സിൽവർ അയോഡൈഡ് പോലുള്ള രാസവസ്തുക്കളാണ് മേഘങ്ങളിലേക്ക് വിതറുന്നത്. എന്നാൽ പുതിയ രീതിയിൽ, ഉയർന്ന ശേഷിയുള്ള ലേസർ പൾസുകൾ അന്തരീക്ഷത്തിലേക്ക് തൊടുത്തുവിടുകയാണ് ചെയ്യുന്നത്. ഈ രശ്മികൾ അന്തരീക്ഷത്തിൽ പ്ലാസ്മ ചാനലുകൾ അഥവാ ചെറിയ മിന്നലുകൾക്ക് സമാനമായ പാതകൾ സൃഷ്ടിക്കുകയും ഇത് ജലബാഷ്പം വേഗത്തിൽ ഘനീഭവിച്ച് മഴത്തുള്ളികളായി മാറാൻ സഹായിക്കുകയും ചെയ്യും. രാസവസ്തുക്കൾ ഉപയോഗിക്കാത്തതിനാൽ ഇത് പൂർണ്ണമായും പരിസ്ഥിതി സൗഹൃദമാണെന്ന പ്രത്യേകതയുമുണ്ട്.

ALSO READ: ഷാർജയിൽ ഇനി എയർ ടാക്സിയും കാർഗോ ഡ്രോണുകളും; വൻ പദ്ധതിയുമായി എക്സിക്യൂട്ടീവ് കൗൺസിൽ

യുഎഇയിലെ ഏത് ഭാഗത്തും കൊണ്ടുപോയി പ്രവർത്തിപ്പിക്കാവുന്ന 'മൊബൈൽ ഹൈ-പവർ പൾസ്ഡ് ലേസർ' പ്രോട്ടോടൈപ്പ് ഇതിനായി ഗവേഷകർ തയ്യാറാക്കിയിട്ടുണ്ട്. നൂതനമായ ഈ സംവിധാനത്തിലൂടെ ഏത് ഭാഗത്ത് മഴ പെയ്യിക്കണം എന്ന് കൃത്യമായി നിയന്ത്രിക്കാൻ സാധിക്കും. നാഷണൽ സെന്റർ ഓഫ് മെറ്റീരിയോളജിക്ക് (NCM) കീഴിലുള്ള യുഎഇ റിസർച്ച് പ്രോഗ്രാം ഫോർ റെയിൻ എൻഹാൻസ്‌മെന്റ് സയൻസിൽ നിന്ന് 1.5 മില്യൺ ഡോളർ ഗവേഷണ ഗ്രാന്റ് ഈ പദ്ധതിക്ക് ലഭിച്ചു. കൂടാതെ, ഈ സാങ്കേതികവിദ്യയ്ക്ക് യുണൈറ്റഡ് സ്റ്റേറ്റ്സ് പേറ്റന്റ് ആൻഡ് ട്രേഡ്മാർക്ക് ഓഫീസിൽ സംയുക്ത പേറ്റന്റിനായി അപേക്ഷയും നൽകിയിട്ടുണ്ട്.

കാലാവസ്ഥാ വ്യതിയാനവും ജലക്ഷാമവും നേരിടുന്നതിൽ യുഎഇ നടത്തുന്ന ഈ പരീക്ഷണം വിജയിച്ചാൽ, ലോകത്തിലെ വരണ്ട പ്രദേശങ്ങളിലെ ജലലഭ്യതയിൽ വലിയ മാറ്റങ്ങൾ കൊണ്ടുവരാൻ സാധിക്കുമെന്ന് ഗവേഷണത്തിന് നേതൃത്വം നൽകുന്ന ഡോ. ഗില്ലൂം മട്രാസ് പറഞ്ഞു. ഇമാറാത്തി ഗവേഷകരായ ഷമ്മ അൽ മസ്രുയി, റീം അൽ അമേരി എന്നിവരുൾപ്പെടെയുള്ള വിദഗ്ദ്ധ സംഘമാണ് പദ്ധതിക്ക് പിന്നിൽ പ്രവർത്തിക്കുന്നത്. വരും വർഷങ്ങളിൽ ജല സുരക്ഷ ഉറപ്പാക്കുന്നതിൽ ലേസർ വിദ്യ നിർണ്ണായകമാകുമെന്നാണ് അധികൃതരുടെ പ്രതീക്ഷ.

the uae has moved a new laser-based cloud seeding technology to field trials, aiming to trigger rainfall without using chemical agents. the innovative approach could transform weather modification efforts and strengthen water security across arid regions.