അബുദബി: മേഖലയിലെ വ്യോമാതിർത്തി നിയന്ത്രണങ്ങളെത്തുടർന്ന് നിർത്തിവെച്ചിരുന്ന വിമാന സർവീസുകൾ ഭാ​ഗികമായി പുനരാരംഭിച്ച് ഇത്തിഹാദ് എയർവേയ്‌സ്. ലോകമെമ്പാടുമുള്ള 70 ലക്ഷ്യസ്ഥാനങ്ങളിലേക്ക് പ്രത്യേക സർവീസുകൾ നടത്തുമെന്ന് ഇത്തിഹാദ് അറിയിച്ചു.

മാർച്ച് 19 വരെ പ്രത്യേക ഷെഡ്യൂൾ

നിലവിലെ സാഹചര്യങ്ങൾ കണക്കിലെടുത്ത് പ്രവർത്തനങ്ങൾ ഘട്ടംഘട്ടമായി സാധാരണ നിലയിലാക്കുന്നതിന്റെ ഭാഗമായാണ് പുതിയ നീക്കം. മാർച്ച് 6 മുതൽ മാർച്ച് 19 വരെയുള്ള കാലയളവിലേക്കാണ് നിലവിൽ വിമാനങ്ങൾ നിശ്ചയിച്ചിരിക്കുന്നത്. യൂറോപ്പ്, ഏഷ്യ, വടക്കേ അമേരിക്ക, ആഫ്രിക്ക, മിഡിൽ ഈസ്റ്റ് എന്നിവിടങ്ങളിലെ പ്രധാന നഗരങ്ങൾ ഇതിൽ ഉൾപ്പെടുന്നു.

ALSO READ: യുഎഇയിൽ കുടുങ്ങിയ യാത്രക്കാർക്ക് ആശ്വാസം; സൗജന്യ ചികിത്സയും മരുന്നുകളുമായി ആരോഗ്യ സ്ഥാപനങ്ങൾ

ലണ്ടൻ, ന്യൂയോർക്ക് സിറ്റി, പാരീസ്, സിഡ്‌നി, സിംഗപ്പൂർ, ടോക്കിയോ, ടൊറന്റോ തുടങ്ങിയ ആഗോള നഗരങ്ങളിലേക്കും അഹമ്മദാബാദ്, ബെംഗളൂരു തുടങ്ങിയ ഇന്ത്യൻ നഗരങ്ങളിലേക്കും സർവീസുകൾ ഉണ്ടാകും. കൂടാതെ ആംസ്റ്റർഡാം, ഏതൻസ്, അറ്റ്ലാന്റ, ബാങ്കോക്ക്, ബാഴ്‌സലോണ, ബെയ്ജിംഗ്, ബോസ്റ്റൺ, ബ്രസ്സൽസ്, കെയ്‌റോ, അഡിസ് അബാബ എന്നിവിടങ്ങളിലേക്കും വിമാനങ്ങൾ പറക്കും.

ALSO READ: ഇറാൻ-ഇസ്റാഈൽ സംഘർഷം: 84 മണിക്കൂറിനുള്ളിൽ ദുബൈയിൽ നിന്നു പറന്നത് 1,140 വിമാനങ്ങൾ; ജാഗ്രതാ നിർദ്ദേശവുമായി യുഎഇ

യാത്രക്കാർ ശ്രദ്ധിക്കാൻ

ദിവസേനയുള്ള സർവീസുകൾ ഇല്ല: താൽക്കാലിക ഷെഡ്യൂൾ പ്രകാരം എല്ലാ നഗരങ്ങളിലേക്കും എല്ലാ ദിവസവും വിമാനങ്ങൾ ഉണ്ടായിരിക്കില്ല. അതിനാൽ യാത്ര പുറപ്പെടുന്നതിന് മുൻപ് ഇത്തിഹാദ് വെബ്‌സൈറ്റിലൂടെ ഫ്ലൈറ്റ് സ്റ്റാറ്റസും പ്രവർത്തന ദിവസങ്ങളും പരിശോധിക്കേണ്ടതാണ്.

മാറ്റങ്ങൾക്ക് സാധ്യത: വ്യോമാതിർത്തിയിലെ സുരക്ഷാ സാഹചര്യങ്ങൾക്കും ഔദ്യോഗിക അംഗീകാരങ്ങൾക്കും വിധേയമായിട്ടായിരിക്കും സർവീസുകൾ. അതിനാൽ ഷെഡ്യൂളുകളിൽ എപ്പോൾ വേണമെങ്കിലും മാറ്റങ്ങൾ വരാം.

സ്ഥിരീകരിച്ച ബുക്കിംഗ്: ദുബൈ, അബുദബി, ഷാർജ തുടങ്ങിയ വിമാനത്താവളങ്ങളിൽ നിന്ന് പരിമിതമായ സർവീസുകൾ പുനരാരംഭിച്ചിട്ടുണ്ടെങ്കിലും, സ്ഥിരീകരിച്ച ടിക്കറ്റുകൾ ഉള്ളവർ മാത്രമേ വിമാനത്താവളത്തിലേക്ക് എത്താവൂ എന്ന് അധികൃതർ നിർദ്ദേശിച്ചു.

Etihad Airways has resumed flight operations and announced special services to nearly 70 cities worldwide. the move aims to ease travel disruptions and help passengers reach their destinations as regional aviation schedules gradually return to normal.