റിയാദ്: സഊദി അറേബ്യക്കും ഗൾഫ് രാഷ്ട്രങ്ങൾക്കും നേരെയുള്ള ഇറാന്റെ തുടർച്ചയായ ആക്രമണങ്ങൾ കൂടുതൽ സംഘർഷത്തെ സൂചിപ്പിക്കുന്നുണ്ടെന്നും അത് ഇപ്പോഴും ഭാവിയിലും ബന്ധങ്ങളിൽ കാര്യമായ പ്രത്യാഘാതങ്ങൾ ഉണ്ടാക്കുമെന്നും സഊദി വിദേശകാര്യ മന്ത്രാലയം പ്രസ്താവനയിൽ പറഞ്ഞു. അയൽ രാജ്യങ്ങളെ ആക്രമിക്കാൻ ഇറാന് പദ്ധതിയില്ലായിരുന്നെന്ന് ഇറാനിയൻ പ്രസിഡന്റ് മസൂദ് പെഷേഷ്കിയാൻ നടത്തിയ പ്രസ്താവനകൾ യാഥാർത്ഥ്യത്തിൽ പ്രതിഫലിച്ചിട്ടില്ലെന്നും സഊദി അറേബ്യ വ്യക്തമാക്കി.

പ്രസിഡന്റിന്റെ പ്രസംഗത്തിനിടയിലോ അതിനുശേഷമോ ഇറാൻ ആ പ്രഖ്യാപനം നടപ്പാക്കിയിട്ടില്ലെന്നും അടിസ്ഥാനരഹിതമായ ന്യായീകരണങ്ങളെ അടിസ്ഥാനമാക്കിയുള്ള ആക്രമണങ്ങൾ തുടരുകയാണെന്നും സഊദി അറേബ്യ സ്ഥിരീകരിക്കുന്നുവെന്നും വിദേശകാര്യ മന്ത്രാലയം പുറത്തിറക്കിയ പ്രസ്താവനയിൽ പറഞ്ഞു. സഊദി അറേബ്യക്കകത്ത് നിന്ന് യുദ്ധവിമാനങ്ങളും വ്യോമ ഇന്ധനം നിറയ്ക്കുന്ന വിമാനങ്ങളും യുദ്ധത്തിൽ പങ്കെടുക്കുന്നുണ്ടെന്ന അവകാശവാദങ്ങളും സഊദി അറേബ്യ നിരസിച്ചു.

സഊദി അറേബ്യയുടെയും ഗൾഫ് സഹകരണ കൗൺസിൽ രാജ്യങ്ങളുടെയും വ്യോമാതിർത്തികളിൽ നിരീക്ഷണം നടത്തുന്നുണ്ട്, ഇറാനിയൻ മിസൈലുകളിൽ നിന്നും ഡ്രോണുകളിൽ നിന്നും നിരീക്ഷിക്കുന്നതിനും സംരക്ഷിക്കുന്നതിനുമായി തങ്ങളുടെ യുദ്ധ വിമാനങ്ങൾ പ്രതിരോധ പട്രോളിംഗ് നടത്തുന്നുണ്ട്, സിവിലിയൻ സ്ഥലങ്ങൾ, വിമാനത്താവളങ്ങൾ, എണ്ണ കേന്ദ്രങ്ങൾ എന്നിവ ലക്ഷ്യമിടുന്നത് സുരക്ഷയ്ക്കും സ്ഥിരതയ്ക്കും ഭീഷണിയാണ്, അന്താരാഷ്ട്ര കൺവെൻഷനുകളുടെയും അന്താരാഷ്ട്ര നിയമങ്ങളുടെയും വ്യക്തമായ ലംഘനമാണിത്, സഊദി അറേബ്യ വ്യക്തമാക്കി.

തങ്ങൾക്കെതിരെയും, ജിസിസി രാജ്യങ്ങൾ, നിരവധി അറബ്, ഇസ്‌ലാമിക, സൗഹൃദ രാജ്യങ്ങൾ എന്നിവയെയും ലക്ഷ്യം വച്ചുള്ള ഇറാനിയൻ ആക്രമണങ്ങളെ സഊദി അറേബ്യ ശക്തമായി അപലപിച്ചു. തങ്ങളുടെ സുരക്ഷ, പരമാധികാരം, പൗരന്മാരുടെയും താമസക്കാരുടെയും സുരക്ഷ എന്നിവ സംരക്ഷിക്കുന്നതിനും ആക്രമണം തടയുന്നതിനും ആവശ്യമായ എല്ലാ നടപടികളും സ്വീകരിക്കാനുള്ള പൂർണ്ണ അവകാശം തങ്ങൾക്കുണ്ടെന്ന് സഊദി അറേബ്യ ആവർത്തിച്ചു.