സിയൂള്‍: ആണവായുധ ആക്രമണത്തിനു മുതിര്‍ന്നാല്‍ ഉത്തര കൊറിയന്‍ തലസ്ഥാനമായ പ്യോങ്‌യാങ് ചാരമാക്കുമെന്ന് ദക്ഷിണ കൊറിയ അറിയിച്ചു. ഉത്തരകൊറിയയുടെ എല്ലാ ഭാഗങ്ങളും തകര്‍ക്കാനുള്ള സൈനികശേഷിയുണ്ടെന്ന് ദക്ഷിണ കൊറിയന്‍ സൈന്യത്തെ ഉദ്ധരിച്ച് ഔദ്യോഗിക വാര്‍ത്താ ഏജന്‍സി യോന്‍ഹാപ് അറിയിച്ചു.
ഉത്തര കൊറിയയെ ലക്ഷ്യംവച്ച് ആക്രമണശേഷിയുള്ള ബാലിസ്റ്റിക് മിസൈല്‍ സജ്ജമാണെന്നും ദക്ഷിണ കൊറിയ പറയുന്നു. ഇതോടെ മേഖലയില്‍ സംഘര്‍ഷം വര്‍ധിക്കുകയാണ്. വെള്ളിയാഴ്ച ഉത്തര കൊറിയ അഞ്ചാമത്തെ ആണവപരീക്ഷണം നടത്തിയിരുന്നു. ഇതിന്റെ പശ്ചാത്തലത്തില്‍ യു.എസ് ഉ.കൊറിയക്കെതിരേ ഉപരോധത്തിനു ശുപാര്‍ശ ചെയ്തിരുന്നു. ഉപരോധം പരിഗണിക്കുമെന്ന് യു.എന്‍ രക്ഷാസമിതിയും അറിയിച്ചിട്ടുണ്ട്.