ഡല്‍ഹി: മദ്യനയ അഴിമതിക്കേസില്‍ അറസ്റ്റിലായ ആംആദ്മി നേതാവ് അരവിന്ദ്് കെജ്‌രിവാളിനെ ഡല്‍ഹി മുഖ്യമന്ത്രി സ്ഥാനത്ത് നിന്ന് നീക്കണമെന്ന ഹരജി ഡല്‍ഹി ഹൈക്കോടതി തള്ളി. കെജ്‌രിവാളിനെ സ്ഥാനഭ്രഷ്ടനാക്കണമെന്ന് കാണിച്ച് ഫയല്‍ ചെയ്ത പൊതുതാല്‍പര്യ ഹരജിയാണ് ചീഫ് ജസ്റ്റിസ് മന്‍മോഹന്‍ അധ്യക്ഷനായ ബെഞ്ച് തള്ളിയത്. ജനാധിപത്യം അതിന്റെ വഴിക്ക് നീങ്ങട്ടെയെന്ന് കോടതി ഉത്തരവില്‍ പറഞ്ഞു. 

മുഖ്യമന്ത്രി സ്ഥാനത്ത് നിന്ന് മാറണോ എന്നത് കെജ്‌രിവാളിന്റെ തീരുമാനമാണ്. വ്യക്തിപരമായ താല്‍പര്യങ്ങള്‍ ദേശീയ താല്‍പര്യത്തിന് കീഴിലായിരിക്കുമെന്നും കോടതി ചൂണ്ടിക്കാട്ടി. 

മദ്യനയ കേസില്‍ ഏപ്രില്‍ 15 വരെ ജുഡീഷ്യല്‍ കസ്റ്റഡിയില്‍ വിട്ടതിന് പിന്നാലെയാണ് കെജ് രിവാളിനെ സ്ഥാനത്ത് നിന്ന് നീക്കണമെന്ന ആവശ്യവുമായി ഹിന്ദു സേന പ്രസിഡന്റ് വിഷ്ണു ഗുപ്ത ഹരജി ഫയല്‍ ചെയ്തത്. ഉത്തരവിന് പിന്നാലെ വിഷ്ണു ഗുപ്ത ഹരജി പിന്‍വലിക്കുകയും ആവശ്യവുമായി ലെഫ്റ്റനന്റ് ഗവര്‍ണറെ സമീപിക്കുമെന്നും വ്യക്തമാക്കിയിട്ടുണ്ട്. 

അതേസമയം കെജ് രിവാള്‍ രാജി വെക്കേണ്ടതില്ലെന്ന നിലപാടിലാണ് ആം ആദ്മി. ചൊവ്വാഴ്ച്ച ആപ് എം.എല്‍.എമാര്‍ കെജ് രിവാളിന്റെ ഭാര്യ സുനിത കെജ് രിവാളുമായി കൂടിക്കാഴ്ച്ച നടത്തുകയും മുഖ്യമന്ത്രി അധികാരം ഒഴിയാതെ ജയിലില്‍ നിന്ന് സര്‍ക്കാരിനെ നയിക്കണമെന്ന് ആവശ്യപ്പെടുകയും ചെയ്തിട്ടുണ്ട്. അതിനിടെ തീഹാല്‍ ജയില്‍ നിന്നുള്ള കെജ് രിവാളിന്റെ സന്ദേശം ഭാര്യ സുനിത പുറത്തുവിട്ടു. ജനങ്ങള്‍ക്ക് എന്ത് പ്രശ്‌നമുണ്ടെങ്കിലും അത് ഉടന്‍ പരിഹരിക്കണമെന്ന് എം.എല്‍.എമാര്‍ക്ക് അദ്ദേഹം നിര്‍ദേശം നല്‍കിയിട്ടുണ്ട്.