കൊച്ചി: തെരഞ്ഞെടുപ്പ് ചെലവ് കണക്ക് സമര്‍പ്പിക്കാത്തതിന്റെ പേരില്‍,  ഒരു സ്ഥാനാർഥിക്ക് കാരണം കാണിക്കല്‍ നോട്ടിസ് നല്‍കാതെ അയോഗ്യനാക്കാന്‍ കഴിയില്ലെന്ന് ഹൈക്കോടതി. സംസ്ഥാന തെരഞ്ഞെടുപ്പ് കമ്മിഷന്‍ നോട്ടിസ് കൃത്യമായി നല്‍കണമെന്നും കോടതി വ്യക്തമാക്കി. 

2020 ലെ  തദ്ദേശ  തെരഞ്ഞെടുപ്പ് ചെലവ് വിശദാംശങ്ങള്‍ സമര്‍പ്പിക്കുന്നതില്‍ വീഴ്ച വരുത്തിയതിന് സംസ്ഥാന തെരഞ്ഞെടുപ്പ് കമ്മിഷന്‍ അയോഗ്യരാക്കിയ തൃശൂരിലെ അന്നമനടയിലെ ധന്യ ദേവദാസും മറ്റ് ഏഴ് പേരും സമര്‍പ്പിച്ച ഒരു കൂട്ടം ഹരജികള്‍ പരിഗണിക്കുകയായിരുന്നു ഹൈക്കോടതി. സ്ഥാനാർഥിയെ അയോഗ്യനാക്കുന്നതിന് മുമ്പ്  കാരണം കാണിക്കല്‍ നോട്ടിസ് അയക്കണമെന്ന് കോടതി നിരീക്ഷിച്ചു. ഹരജിക്കാരെ അയോഗ്യരാക്കിയ കമ്മിഷന്റെ ഉത്തരവുകള്‍ കോടതി റദ്ദാക്കുകയും ചെയ്തു. 

ALSO READ: നിയമസഭാ തെരഞ്ഞെടുപ്പ്: അന്തിമ ചിത്രം ഇന്നറിയാം; പത്രിക പിൻവലിക്കല്‍ വൈകീട്ട്‌ മൂന്ന് വരെ

എന്നാല്‍, സംസ്ഥാന തെരഞ്ഞെടുപ്പ് കമ്മിഷന്‍ തീരുമാനിക്കുകയാണെങ്കില്‍, നിയമപ്രകാരം ഹരജിക്കാര്‍ക്കെതിരേ നടപടിയെടുക്കുന്നതില്‍ നിന്ന് ഉത്തരവിലെ തീരുമാനം തടയില്ലെന്ന് കോടതി വ്യക്തമാക്കി.