തിരുവനന്തപുരം: നിയമസഭാ തെരഞ്ഞെടുപ്പ്  പ്രചാരണത്തിനായി എ.ഐ.സി.സി ജനറൽ സെക്രട്ടറി പ്രിയങ്ക ഗാന്ധി ഇന്ന് കേരളത്തിലെത്തും. തിരുവനന്തപുരം, കൊല്ലം ജില്ലകളിലെ വിവിധ മണ്ഡലങ്ങളിലായി നടക്കുന്ന പൊതുസമ്മേളനങ്ങളിലും കോര്‍ണര്‍ മീറ്റിങുകളിലും  പ്രിയങ്കാ ഗാന്ധി പങ്കെടുക്കും. രാവിലെ 11ന് ചിറയിന്‍കീഴ് നിയോജകമണ്ഡലത്തിലെ പുത്തന്‍തോപ്പില്‍ നടക്കുന്ന കോര്‍ണര്‍ മീറ്റിങ്ങോടുകൂടിയാണ് പ്രിയങ്കയുടെ പര്യടനം ആരംഭിക്കുന്നത്. തീരദേശമേഖലയിലെ വോട്ടര്‍മാരെ നേരില്‍ കണ്ട് പ്രിയങ്ക സംസാരിക്കും. തുടര്‍ന്ന് കൊല്ലത്തേക്ക് തിരിക്കുന്ന പ്രിയങ്ക ഉച്ചയ്ക്ക് 12.30ന് കൊല്ലം കാന്റോണ്‍മെന്റ് മൈതാനത്ത് സംഘടിപ്പിക്കുന്ന  പൊതുസമ്മേളനത്തെ അഭിസംബോധന ചെയ്യും. ഉച്ചകഴിഞ്ഞ്  രണ്ടിന് വട്ടിയൂര്‍ക്കാവ്  മണ്ഡലത്തിലെ കവടിയാര്‍ സാല്‍വേഷന്‍ ആര്‍മി സ്‌കൂള്‍ ഗ്രൗണ്ടില്‍ പൊതുസമ്മേളനത്തിലും പങ്കെടുക്കും.