തിരുവനന്തപുരം: കേരളത്തിന്റെ ഭാവി നിശ്ചയിക്കാന്‍ ഇനി ആറു ദിനങ്ങള്‍ മാത്രം ബാക്കി. അടുത്ത ചൊവ്വാഴ്ച പരസ്യപ്രചാരണത്തിന് തിരശ്ശീല വീഴാനിരിക്കെ, വോട്ടര്‍മാരെ സ്വാധീനിക്കാന്‍ ആഞ്ഞുപിടിക്കുകയാണ് മുന്നണികള്‍. ദേശീയ നേതാക്കളെയും താരപ്രചാരകരെയും അണിനിരത്തി ഓരോ മണ്ഡലത്തിലും ആവേശം വിതറാനുള്ള നീക്കത്തിലാണ് എല്‍.ഡി.എഫ്, യു.ഡി.എഫ്, എന്‍.ഡി.എ ക്യാമ്പുകള്‍.

എല്‍.ഡി.എഫ് ഭരണം നിലനിര്‍ത്താനായി തുടര്‍ഭരണം ലക്ഷ്യമിട്ട് മുഖ്യമന്ത്രി പിണറായി വിജയന്റെ നേതൃത്വത്തിലാണ് ഇടതുമുന്നണിയുടെ പടയോട്ടം. സംസ്ഥാന വ്യാപകമായ പര്യടനം പൂര്‍ത്തിയാക്കിയ മുഖ്യമന്ത്രി, പത്തു ദിവസത്തെ ഇടവേളയ്ക്ക് ശേഷം ഇന്ന് സ്വന്തം മണ്ഡലമായ ധര്‍മ്മടത്ത് പ്രചാരണത്തിനെത്തും. അദ്ദേഹത്തിന്റെ വരവ് പ്രവര്‍ത്തകര്‍ക്ക് വലിയ ആവേശമാണ് പകരുന്നത്.

യു.ഡി.എഫ് ഭരണം തിരിച്ചുപിടിക്കാനായി പത്തു വര്‍ഷത്തെ ഇടതുഭരണത്തിന് അന്ത്യം കുറിക്കാനുള്ള തീവ്രശ്രമത്തിലാണ് ഐക്യജനാധിപത്യ മുന്നണി. രാഹുല്‍ ഗാന്ധിക്ക് പുറമെ പ്രിയങ്ക ഗാന്ധി, തെലങ്കാന മുഖ്യമന്ത്രി രേവന്ത് റെഡ്ഡി എന്നിവരും മണ്ഡലങ്ങളില്‍ സജീവമായി വോട്ടുതേടുന്നുണ്ട്. വമ്പിച്ച ജനപിന്തുണയോടെ അധികാരം തിരിച്ചുപിടിക്കാമെന്ന ഉറച്ച വിശ്വാസത്തിലാണ് യു.ഡി.എഫ്.

എന്‍.ഡി.എ- തിരുവനന്തപുരം കോര്‍പ്പറേഷനിലെ മികച്ച പ്രകടനത്തിന്റെ ആത്മവിശ്വാസത്തില്‍നിയമസഭയിലും കരുത്തുറ്റ വിജയം നേടാനാണ് ബി.ജെ.പി ശ്രമം. പ്രധാനമന്ത്രി നരേന്ദ്ര മോദി നാളെ വീണ്ടും കേരളത്തിലെത്തും. പാലായിലും തിരുവനന്തപുരത്തും അദ്ദേഹം നടത്തുന്ന പ്രചാരണ പരിപാടികള്‍ എന്‍.ഡി.എ ക്യാമ്പിന് വലിയ ഊര്‍ജ്ജം നല്‍കും.

അടുത്ത ഏതാനും ദിവസങ്ങള്‍ കേരള രാഷ്ട്രീയത്തില്‍ നിര്‍ണ്ണായകമാണ്. വോട്ടര്‍മാരുടെ മനസ്സ് ആര്‍ക്കൊപ്പമാണെന്ന് അറിയാന്‍ ഇനി ദിവസങ്ങളുടെ കാത്തിരിപ്പ് മാത്രം.

kerala enters the final week of high-octane election campaigning as top leaders from all three major fronts descend on the state for a closing showdown.