ദുബൈ: ദുബൈയുടെ സാമ്പത്തിക മേഖലയ്ക്ക് കരുത്തുപകരാൻ വൻ പ്രഖ്യാപനവുമായി ദുബൈ കിരീടാവകാശി ശൈഖ് ഹംദാൻ ബിൻ മുഹമ്മദ് ബിൻ റാഷിദ് അൽ മക്തൂം. 1.5 ബില്യൺ ദിർഹത്തിന്റെ പുതിയ സാമ്പത്തിക പ്രോത്സാഹന പാക്കേജിനാണ് അദ്ദേഹം അംഗീകാരം നൽകിയത്. ഇതോടെ കഴിഞ്ഞ രണ്ട് മാസത്തിനിടെ ദുബൈ പ്രഖ്യാപിച്ച ആകെ സാമ്പത്തിക സഹായം 2.5 ബില്യൺ ദിർഹമായി ഉയർന്നു.

പുതിയ പാക്കേജിൽ ആകെ 33 പ്രധാന സംരംഭങ്ങൾ ഉൾപ്പെടുന്നു. വരും മാസങ്ങളിൽ ഇവ ഘട്ടങ്ങളായി നടപ്പിലാക്കുമെന്ന് യുഎഇ ഉപപ്രധാനമന്ത്രിയും പ്രതിരോധ മന്ത്രിയും കൂടിയായ ശൈഖ് ഹംദാൻ വ്യക്തമാക്കി. ടൂറിസം, വ്യാപാരം, വിദ്യാഭ്യാസം, കസ്റ്റംസ് തുടങ്ങിയ പ്രധാന മേഖലകൾക്ക് വലിയ ആശ്വാസം നൽകുന്നതാണ് പുതിയ ഇളവുകൾ. യുഎഇ ഉപരാഷ്ട്രപതിയും ദുബൈ ഭരണാധികാരിയുമായ ശൈഖ് മുഹമ്മദ് ബിൻ റാഷിദ് അൽ മക്തൂമിന്റെ ദർശനങ്ങൾക്ക് അനുസൃതമായാണ് ഈ നടപടി.

ടൂറിസം മേഖലയിലെ ഇളവുകൾ

ഹോട്ടലുകളിൽ നിന്നുള്ള ടൂറിസം ദിർഹം പിരിവ് താൽക്കാലികമായി ഒഴിവാക്കി. ഹോട്ടൽ മുറികളുടെയും റസ്റ്റോറന്റുകളുടെയും വിൽപനയ്ക്കുള്ള മുനിസിപ്പൽ ഫീസിലും ഇളവ് നൽകിയിട്ടുണ്ട്. കൂടാതെ, വിനോദ പരിപാടികൾ സംഘടിപ്പിക്കുന്നതിനുള്ള പെർമിറ്റ് ഫീസുകൾ, റദ്ദാക്കൽ ഫീസുകൾ എന്നിവയും പൂർണ്ണമായി ഒഴിവാക്കി.

ചെറുകിട, ഇടത്തരം സംരംഭങ്ങൾക്കായുള്ള മുഹമ്മദ് ബിൻ റാഷിദ് എസ്റ്റാബ്ലിഷ്‌മെന്റിൽ രജിസ്റ്റർ ചെയ്ത കമ്പനികൾക്ക് വലിയ ആശ്വാസമാകും. 2026-ൽ കാലാവധി തീരുന്ന ഇത്തരം കമ്പനികളുടെ അംഗത്വ ലൈസൻസ് രണ്ട് വർഷത്തേക്ക് കൂടി നീട്ടി നൽകി. വിവിധ വിൽപനകൾക്കും പ്രമോഷണൽ ഓഫറുകൾക്കുമുള്ള ഫീസുകൾ ഒഴിവാക്കി. സപ്ലൈ കരാറുകളുടെ സെക്യൂരിറ്റി തുക 10 ശതമാനത്തിൽ നിന്ന് 2 ശതമാനമായി കുറയ്ക്കുകയും ചെയ്തു.

കുട്ടികളുടെ ആദ്യകാല സംരക്ഷണ കേന്ദ്രങ്ങൾക്ക് (Early Childhood Centers) വിപുലമായ ഇളവുകൾ പ്രഖ്യാപിച്ചു. സ്വകാര്യ വിദ്യാഭ്യാസ സ്ഥാപനങ്ങളുടെ ലൈസൻസ് പുതുക്കൽ ഫീസും പിഴകളും അടയ്ക്കുന്നതിന് ഇളവ് അനുവദിച്ചു. ഈ തുക തവണകളായി അടയ്ക്കാനുള്ള സൗകര്യവും ഒരുക്കിയിട്ടുണ്ട്.

കസ്റ്റംസ് സേവനങ്ങൾ

ഇറക്കുമതിയുമായി ബന്ധപ്പെട്ട കസ്റ്റംസ് ഡിക്ലറേഷൻ തുകകൾ ഇനിമുതൽ ഗഡുക്കളായി അടയ്ക്കാൻ വ്യാപാരികൾക്ക് അവസരമുണ്ട്. കൂടാതെ, കസ്റ്റംസ് കേസുകളിലെ പിഴകളിൽ 80 ശതമാനം വരെ വൻ കുറവും വരുത്തിയിട്ടുണ്ട്.

ഗതാഗത മേഖലയിലെ പെയ്‌മെന്റുകൾ അടയ്ക്കാൻ കൂടുതൽ സമയം അനുവദിച്ചു. പ്രത്യേക പിഴകളിൽ നിന്ന് ഈ മേഖലയെ ഒഴിവാക്കിയിട്ടുണ്ട്. വ്യോമയാന മേഖലയ്ക്ക് കരുത്തുപകരാൻ സിവിൽ ഏവിയേഷൻ പ്രവർത്തന പെർമിറ്റുകൾ പുതുക്കുന്നതിനുള്ള ഫീസിൽ 50 ശതമാനം ഇളവും പ്രഖ്യാപിച്ചു.

ALSO READ: ദുബൈ ഗ്ലോബല്‍ വില്ലേജ് ഇനി 10 ദിവസം കൂടി മാത്രം; പെരുന്നാള്‍ ആഘോഷങ്ങള്‍ക്കും വന്‍ ഓഫറുകള്‍ക്കും അവസാന അവസരം

Dubai Crown Prince Sheikh Hamdan announced an additional AED 1.5 billion economic support package aimed at boosting business growth, strengthening key sectors, and accelerating the emirate’s long-term economic development plans.