തിരുവനന്തപുരം:പതിനാറാം നിയമസഭയില്‍ എം.എല്‍.എയായി സത്യപ്രതിജ്ഞ ചെയ്ത് മുന്‍ മുഖ്യമന്ത്രിയും പ്രതിപക്ഷ നേതാവുമായ പിണറായി വിജയന്‍. സഗൗരവമാണ് സത്യപ്രതിജ്ഞ ചെയ്തത്. സഭയില്‍ 133ാമത്തെ അംഗമായാണ് പിണറായി സത്യപ്രതിജ്ഞ ചെയ്തത്. 

സി.പി.എം പാളയം വിട്ട് യു.ഡി.എഫ് പിന്തുണയോടെ നിയമസഭയിലെത്തുകയും പ്രോടേം സ്പീക്കാറായി ചുമതലയേല്‍ക്കുകയും ചെയ്ത മുതിര്‍ന്ന നേതാവ് ജി. സുധാകരന് മുന്നില്‍ മുന്‍ മുഖ്യമന്ത്രിയും പുതിയ പ്രതിപക്ഷ നേതാവുമായ പിണറായി വിജയന്‍ എം.എല്‍.എയായി സത്യപ്രതിജ്ഞ ചെയ്തതെന്ന കൗതുകവുമുണ്ട്. സത്യപ്രതിജ്ഞയ്ക്ക് ശേഷം നിറഞ്ഞ ചിരിയോടെ സ്പീക്കറുടെ ഡയസിലേക്കെത്തിയ പിണറായി സുധാകരന് കൈകൊടുത്ത ശേഷം തോളില്‍ തട്ടുകയും ചെയ്തു. സുധാകരനും പിണറായിയെ തിരിച്ച് അഭിവാദ്യം ചെയ്തു. 

ഇന്നലെയാണ് സുധാകരന്‍ എം.എല്‍.എയായി സത്യപ്രതിജ്ഞ ചെയ്തത്. രാഷ്ട്രീയത്തില്‍ ശത്രുത സൂക്ഷിക്കാറില്ലെന്നും, സി.പി.എമ്മിന്റെ തോല്‍വിയുടെ ഉത്തരവാദിത്തത്തില്‍ നിന്ന് പിണറായിക്കും, എ.ംവി ഗോവിന്ദനും ഒഴിഞ്ഞു മാറാന്‍ ആകില്ലെന്നും സുധാകരന്‍ കഴിഞ്ഞ ദിവസം പറഞ്ഞിരുന്നു. 

വീണ്ടും എം.എല്‍.എയായി എത്തുന്നതില്‍ സന്തോഷമുണ്ടെന്നും, തനിക്ക് മുന്നില്‍ പിണറായി വിജയന്‍ സത്യപ്രതിജ്ഞ ചെയ്യുമോ എന്ന ചര്‍ച്ചകളില്‍ താല്‍പര്യമില്ലെന്നും സുധാകരന്‍ പ്രതികരിച്ചു. 63 വര്‍ഷത്തോളം പാര്‍ട്ടിയില്‍ പ്രവര്‍ത്തിച്ചയാളാണ് ഞാന്‍. രാജിവെക്കുകയോ, അംഗത്വം പുതുക്കുകയോ ചെയ്തിട്ടില്ലെന്നും സുധാകരന്‍ വ്യക്തമാക്കി.

സി.പി.എമ്മുമായി ഇടഞ്ഞ് അമ്പലപ്പുഴയില്‍ നിന്ന് സ്വതന്ത്രനായി മത്സരിച്ച സുധാകരന്‍ യു.ഡി.എഫ് പിന്തുണയോടെയാണ് സഭയിലെത്തുന്നത്. സുധാകരന്റെ വിജയം പാര്‍ട്ടിയെ അക്ഷരാര്‍ത്ഥത്തില്‍ ഞെട്ടിച്ചിരുന്നു. ആരെയും അമ്പരപ്പിക്കുന്ന വിജയങ്ങളിലൊന്നാണ് അമ്പലപ്പുഴയില്‍ ജി. സുധാകരന്റേത്. സി.പി.എം സ്ഥാനാര്‍ഥിയും സിറ്റിങ് എം.എല്‍.എയുമായ എച്ച്. സലാമിനെ പിന്നിലാക്കി 27935 വോട്ടുകളുടെ ഭൂരിപക്ഷത്തില്‍ വന്‍ വിജയംതന്നെ സുധാകരന്‍ നേടി. ആകെ നേടിയത് 75184 വോട്ടുകള്‍. തന്നെ വിലകല്‍പ്പിക്കാത്ത പാര്‍ട്ടി നേതൃത്വത്തിന് താനാരാണെന്ന് കാണിച്ചുകൊടുക്കുകയായിരുന്നു ജി. സുധാകരന്‍.

After the swearing-in ceremony, Pinarayi Vijayan warmly greeted Pro Tem Speaker G. Sudhakaran with a smile, handshake, and a friendly pat on the shoulder. The cordial interaction between the two senior leaders drew attention during the proceedings of the Kerala Assembly session and reflected the celebratory atmosphere following the oath-taking event.