തൃശൂര്‍: ആറങ്ങോട്ടുകര കടുകശേരിയില്‍ വയോധികയെ വീടിനുള്ളില്‍ മരിച്ച നിലയില്‍ കണ്ടെത്തി. ദേശമംഗലം ഗ്രാമപഞ്ചായത്തിലെ 15ാം വാര്‍ഡില്‍ ഉള്‍പ്പെടുന്ന കടുകശ്ശേരി തച്ചുകുന്ന് പ്രദേശത്ത് തച്ചോത്ത് വീട്ടില്‍ സഫിയ ( 70 ) യെയാണ് വീടിനുള്ളില്‍ മരിച്ചു കിടക്കുന്ന നിലയില്‍ കാണപ്പെട്ടത്. 

തനിച്ചു താമസിക്കുന്ന സഫിയ സാധാരണയായി തൊട്ടടുത്തുള്ള വീടുകളിലാണ് അന്തിയുറങ്ങാന്‍ പോകുന്നത്. എന്നാല്‍ കഴിഞ്ഞദിവസം അവരെ ഒരു വീടുകളിലും ചെന്നതായി അറിവില്ലാത്തതു കൊണ്ട്  നാട്ടുകാര്‍ അന്വേഷിച്ച് ചെന്നപ്പോഴാണ് മരിച്ചു കിടക്കുന്ന നിലയില്‍ കാണപ്പെട്ടത്. 

സഫിയയുടെ വീടിന്റെ 200 മീറ്റര്‍ ചുറ്റളവില്‍ മറ്റു വീടുകള്‍ ഒന്നുമില്ലാത്തതു കൊണ്ട് ഒറ്റപ്പെട്ട നിലയിലാണ് വീട് ഉള്ളത്.  സഫിയ ധരിച്ചിരുന്ന ആഭരണങ്ങള്‍ നഷ്ടപ്പെട്ടിട്ടുണ്ട്.  കൈകളില്‍ ഉള്‍പ്പെടെ മുറിവ് പറ്റിയതായും കാണുന്നു. 

ചെറുതുരുത്തി പൊലിസ് സ്ഥലത്തെത്തി മേല്‍നടപടികള്‍ സ്വീകരിച്ചു. തുടര്‍ന്ന് രാവിലെ കുന്നംകുളം ഡി.വൈ.എസ്.പി മുരളിയുടെ നേതൃത്വത്തിലുള്ള പൊലിസ് സംഘവും, ഡോഗ് സ്‌ക്വാഡും, ഫോറന്‍സിക് വിഭാഗവും സ്ഥലത്തെത്തി തുടര്‍ നടപടികള്‍ക്ക് ശേഷം മൃതദേഹം തൃശൂര്‍ മെഡിക്കല്‍ കോളേജ് മോര്‍ച്ചറിയിലേക്ക് മാറ്റി. 

സഫിയയുടെ മരണത്തില്‍ ദുരൂഹതയുണ്ടെന്ന് നാട്ടുകാര്‍ പറയുന്നു. പോസ്റ്റുമോര്‍ട്ടം റിപ്പോര്‍ട്ട് കിട്ടിയതിനുശേഷം മാത്രമേ മരണകാരണം സ്ഥിരീകരിക്കാനാവൂവെന്നാണ് പൊലിസ് പറയുന്നത്. 

An elderly person was found dead inside a house under suspicious circumstances, with the jewellery worn by the victim reported missing. Police suspect it could be a case of murder and have launched a detailed investigation.