ആലപ്പുഴ: വീടുകളും ബാങ്കുകളും ഉള്‍പ്പെടെയുള്ള സ്ഥാപനങ്ങളുടെ സുരക്ഷ ഇനി 24 മണിക്കൂറും പൊലിസിന്റെ വിരല്‍ത്തുമ്പില്‍. കേരള പൊലിസും കെല്‍ട്രോണും സംയുക്തമായി നടപ്പാക്കുന്ന സെന്‍ട്രല്‍ ഇന്‍ട്രൂഷന്‍ മോണിറ്ററിങ് സിസ്റ്റം (CIMS) വഴിയാണ് ഈ സുരക്ഷാ കവചം ഒരുങ്ങുന്നത്. മോഷണം, തീപിടിത്തം, വാതകച്ചോര്‍ച്ച തുടങ്ങിയ അടിയന്തര സാഹചര്യങ്ങളില്‍ നിമിഷങ്ങള്‍ക്കകം പൊലിസിന്റെ സഹായം ഉറപ്പാക്കുന്നതാണ് ഈ പദ്ധതി.

സ്ഥാപനങ്ങളില്‍ ഘടിപ്പിച്ചിട്ടുള്ള സെന്‍സറുകള്‍ അസ്വാഭാവികമായ ചലനങ്ങളോ, ചില്ല് തകര്‍ക്കുന്നതോ തീപിടിത്തമോ കണ്ടെത്തിയാല്‍ ഉടന്‍ തന്നെ സിഐഎംഎസ് കണ്‍ട്രോള്‍ റൂമില്‍ അറിയിപ്പ് എത്തും.

കണ്‍ട്രോള്‍ റൂമില്‍ നിന്നും തത്സമയ സിസിടിവി ദൃശ്യങ്ങള്‍ പരിശോധിച്ച്, ഉടന്‍ തന്നെ ഏറ്റവും അടുത്തുള്ള പൊലിസ് പട്രോള്‍ വാഹനത്തിനും സ്റ്റേഷനിലേക്കും വിവരം കൈമാറും.

ബാങ്കുകള്‍, എടിഎമ്മുകള്‍, സ്വര്‍ണ്ണക്കടകള്‍, സര്‍ക്കാര്‍ ഓഫിസുകള്‍, ഫ്‌ലാറ്റുകള്‍, വീടുകള്‍ എന്നിവിടങ്ങളില്‍ ഈ സംവിധാനം ഏര്‍പ്പെടുത്താം.

കെല്‍ട്രോണിന്റെ ഇന്‍സ്റ്റലേഷന്‍ ചാര്‍ജിനൊപ്പം ചെറിയൊരു തുക മാസവരിസംഖ്യയായി നല്‍കിയാല്‍ ഈ സേവനം ലഭ്യമാകും. സ്ഥാപനത്തിന്റെ വലിപ്പവും ഉപകരണങ്ങളുടെ എണ്ണവും അനുസരിച്ചായിരിക്കും ചിലവ് നിശ്ചയിക്കുക.

സ്മാര്‍ട്ട് ടെക്‌നോളജി ഉപയോഗിച്ച് കുറ്റകൃത്യങ്ങള്‍ തടയുക എന്നതാണ് ഈ പദ്ധതിയുടെ ലക്ഷ്യമെന്ന് ആലപ്പുഴ ജില്ലാ പോലീസ് മേധാവി അറിയിച്ചു. കൂടുതല്‍ വിവരങ്ങള്‍ക്ക് www.cimskerala.in എന്ന വെബ്‌സൈറ്റ് സന്ദര്‍ശിക്കാവുന്നതാണ്.

The Central Intrusion Monitoring System (CIMS) is an advanced 24-hour security project by Kerala Police and Keltron that uses sensors and real-time CCTV monitoring to ensure rapid police response to robberies, fires, or gas leaks in homes and businesses.