തൃശൂര്‍: തൃശൂരിലെ ബി.ജെ.പി സ്ഥാനാര്‍ഥി സുരേഷ് ഗോപിയുടെ ആസ്തി വിവരങ്ങള്‍ പുറത്ത്. താരത്തിന്റെ സ്വത്ത് വിവരങ്ങള്‍ അടങ്ങിയ നാമനിര്‍ദേശ പത്രികയുടെ പകര്‍പ്പാണ് തെരഞ്ഞെടുപ്പ് കമ്മീഷന്‍ പുറത്തുവിട്ടത്. പത്രിക പ്രകാരം സുരേഷ് ഗോപിക്ക് 4.07 കോടിയിലധികം രൂപയുടെ ജംഗമ ആസ്തിയാണുള്ളത്. വിവിധ ബാങ്ക് അക്കൗണ്ടുകളിലായി 24 ലക്ഷം രൂപയും 7 ലക്ഷം രൂപയുടെ മ്യൂച്വല്‍ ഫണ്ട്/ ബോണ്ട് എന്നിവയുമുണ്ട്. 

40,000 രൂപയും, 1025 ഗ്രാം സ്വര്‍ണവുമാണ് നടന്റെ കൈവശമുള്ളത്. കൂടാതെ പോസ്‌റ്റോഫീസില്‍ 67 ലക്ഷം രൂപയുടെ നിക്ഷേപവും ഉണ്ടെന്ന് രേഖകള്‍ പറയുന്നു. കൂടാതെ ഭാര്യയുടെ പേരില്‍ 54 ലക്ഷം രൂപ മൂല്യമുള്ള സ്വര്‍ണവും 2 മക്കളുടെ പേരില്‍ 36 ലക്ഷം രൂപ വരുന്ന സ്വര്‍ണവുമുണ്ട്. സുരേഷ് ഗോപിക്ക് 4 കോടി 68 ലക്ഷം രൂപയാണ് ആകെ വരുമാനം. 2023-24 വര്‍ഷത്തെ ആദായ നികുതി റിട്ടേണ്‍ അടിസ്ഥാനമാക്കിയാണ് കണക്ക്. 

4.13 ലക്ഷം രൂപയാണ് ഭാര്യയുടെ വരുമാനം. രണ്ട് മക്കളുടെ പേരില്‍ 3 കോടിയിലേറെ രൂപയുടെ ജംഗമ ആസ്തിയുണ്ട്. സുരേഷ് ഗോപിയുടെ പേരില്‍ 1.87 ലക്ഷം രൂപ മൂല്യമുള്ള സ്വത്തുണ്ട്. ഒപ്പം 2.53 കോടി രൂപ വിലവരുന്ന എട്ട് വാഹനങ്ങളും തിരുനെല്‍വേലിയില്‍ 82.4 ഏക്കര്‍ സ്ഥലവും സ്വന്തമായുണ്ട്. 61 ലക്ഷം രൂപ വിവിധ ബാങ്കുകളില്‍ ലോണുണ്ടെന്നും സുരേഷ് ഗോപി പത്രികയില്‍ വെളിപ്പെടുത്തി. ഇതിന് പുറമെ തന്റെ പേരില്‍ 7ഓളം കേസുകള്‍ നിലവിലുണ്ടെന്നും നടന്‍ വെളിപ്പെടുത്തി. 

അതേസമയം തൃശൂരിലെ യു.ഡി.എഫ് സ്ഥാനാര്‍ഥി കെ. മുരളീധരന് 2.65 കോടി രൂപയുടെ ജംഗമ ആസ്തിയും, 2.61 കോടിയുടെ സ്ഥാവര ആസ്തിയുമാണുള്ളത്. വിവിധ ബാങ്കുകളിലായി രണ്ട് കോടിയിലധികം രൂപയുടെ നിക്ഷേപവും, സ്വന്തമായി മൂന്ന് വാഹനങ്ങളും അദ്ദേഹത്തിനുണ്ട്.