മക്ക: ഈ വര്‍ഷത്തെ ഹജ്ജ് സുഗമമായി നടന്നതില്‍ ഇന്ത്യന്‍ ഹജ്ജ് മിഷന്‍ പൂര്‍ണ്ണ സംതൃപ്തിയില്‍. കുറ്റമറ്റതായ നിലയില്‍ വളരെ കൃത്യതയോടെ നടന്ന ഹജ്ജില്‍ യാതൊരു വിധ പ്രയാസവുമില്ലാതെ ഹാജിമാര്‍ക്ക് സേവനം നല്‍കിയതില്‍ ഇന്ത്യന്‍ ഹജ്ജ് മിഷനു തികഞ്ഞ ചാരിതാര്‍ഥ്യമുണ്ട്. ഇന്ത്യന്‍ ഹജ്ജ് മിഷന്റെ ചുമതലയുള്ള ഹജ്ജ് കോണ്‍സുല്‍ ജനറലാണ് ഈ വര്‍ഷത്തെ ഹജ്ജിനെ കുറിച്ച് പ്രാദേശിക മാധ്യമത്തോട് മനസ്സ് തുറന്നത്. ഹജ്ജിന്റെ സുപ്രധാന കര്‍മ്മങ്ങളെല്ലാം തന്നെ സുഗമമായ നിലയില്‍ നടന്നതില്‍ സന്തോഷവും ചാരിതാര്‍ഥ്യവുമുണ്ടെന്നു അദ്ദേഹം പറഞ്ഞു.

സഊദി ഭരണ കര്‍ത്താക്കളുടെയും സുരക്ഷാ വിഭാഗങ്ങളുടെയും ഹജ്ജ് സേവന ദാതാക്കളുടെയും ആത്മാര്‍ത്ഥമായ പ്രവര്‍ത്തനം മൂലമാണ് ഇത്രയും സുഖകരമായ നിലയില്‍ ഹജ്ജ് പൂര്‍ത്തിയാക്കാന്‍ കഴിഞ്ഞത്. ഒരു ലക്ഷത്തോളം ഹാജിമാര്‍ക്ക് സേവനം നല്‍കുന്ന മക്തബുകള്‍ക്കെതിരെ ഇത് വരെ ഒരു പരാതിയും റിപ്പോര്‍ട്ട് ചെയ്യപ്പെട്ടിട്ടില്ലെന്നും അദ്ദേഹം വ്യക്തമാക്കി.

ഇംഗ്ലിഷ്, ഉറുദു, തുടങ്ങിയ ഭാഷകളില്‍ ഹാജിമാര്‍ക്ക് വേണ്ട നിര്‍ദേശങ്ങള്‍ സമയാസമയങ്ങളില്‍ നല്‍കാന്‍ കഴിഞ്ഞു. സുരക്ഷാ കാര്യങ്ങളില്‍ കുറ്റമറ്റ സംവിധാനങ്ങളാണ് സഊദി ഭരണ കൂടം ഒരുക്കിയിരിക്കുന്നത്. കൂടാതെ ആരോഗ്യ രംഗത്തു സ്വീകരിച്ച നിലപാട് എടുത്തു പറയേണ്ടതാണ്.ആരോഗ്യ വകുപ്പ് അധികൃതരുടെ സമയോചിത ഇടപെടല്‍ ഹാജിമാര്‍ക്ക് ഗുണകരമായി.
ഹജ്ജ് കര്‍മ്മങ്ങള്‍ തുടങ്ങിയ ദിനം മുതല്‍ ഇത് വരെ മൂന്നു മരണം മാത്രമാണ് റിപ്പോര്‍ട്ട് ചെയ്യപ്പെട്ടത്. മുന്‍ വര്‍ഷങ്ങളില്‍ അത് മുപ്പതു മുതല്‍ 40 വരെ ആയി ഉയര്‍ന്നിട്ടുണ്ട്. ഹജ്ജ് കോണ്‍സുല്‍ ജനറല്‍ മുഹമ്മദ് നൂര്‍ റഹ്മാന്‍ ഷെയ്ഖ് പറഞ്ഞു. ഇന്ത്യന്‍ ഹജ് മിഷന്‍ സി.ഇ.ഒ അതാഉറഹ്മാനും ഈ വര്‍ഷത്തെ ഹജ്ജ് പ്രവര്‍ത്തനങ്ങളില്‍ സന്തോഷം പ്രകടിപ്പിച്ചു. താന്‍ സാക്ഷ്യം വഹിച്ചതില്‍ വച്ച് ഏറ്റവും മികച്ച ഹജ്ജായിരുന്നു ഈ വര്‍ഷത്തേതെന്നും ഇവര്‍ സാക്ഷ്യപ്പെടുത്തി. ഇന്ത്യന്‍ അംബാസിഡര്‍ അഹ്മദ് ജാവേദും പ്രധാനമന്ത്രിയുടെ ഹജ്ജ് സൗഹൃദ സംഘ പ്രതിനിധികളും ഹാജിമാരുടെ ക്ഷേമം ഉറപ്പു വരുത്തുന്നതില്‍ അതീവ ശ്രദ്ധ പാലിച്ചിരുന്നുവെന്നും തങ്ങളോടൊപ്പം സദാ സമയവും പ്രവര്‍ത്തനത്തിന് നേതൃത്വം നല്‍കി ഉണ്ടായിരുന്നുവെന്നും ഇരുവരും പറഞ്ഞു.