തിരുവനന്തപുരം: റെയിൽവേ ടിക്കറ്റ് ബുക്കിങ്ങിലെ കുതിപ്പിന് പിന്നാലെ ഡിജിറ്റൽ പേയ്മെന്റ് രംഗത്തും ആധിപത്യമുറപ്പിക്കാൻ റെയിൽവേ കാറ്ററിങ് ആൻഡ് ടൂറിസം കോർപറേഷൻ. 'ഐ.ആർ.സി.ടി.സി പേയ്മെന്റ്സി'ലൂടെ പ്രതിവർഷം ഒരു ലക്ഷം കോടി രൂപയുടെ ഇടപാടുകൾ കൈകാര്യം ചെയ്യാനാണ് ലക്ഷ്യമിടുന്നത്. ടിക്കറ്റ് ബുക്കിങ്ങിന് പുറമെ വിവിധ സർക്കാർ വകുപ്പുകളുടെ സേവനങ്ങളുടെയും പൊതുമേഖലാ സ്ഥാപനങ്ങളുടെയും പ്രധാന പേയ്മെന്റ് ഗേറ്റ്വേയായി മാറാനാണ് ലക്ഷ്യമിടുന്നത്. കഴിഞ്ഞവർഷം റിസർവ് ബാങ്കിൽ നിന്ന് പേയ്മെന്റ് അഗ്രഗേറ്ററായി പ്രവർത്തിക്കാൻ തത്വത്തിൽ അനുമതി ലഭിച്ചതോടെയാണ് ഈ നീക്കം സജീവമാക്കിയത്. സാങ്കേതിക സൗകര്യങ്ങൾ വർധിപ്പിക്കുന്നതിനുള്ള ശ്രമത്തിലാണ്.

നിലവിൽ ഐ.ആർ.സി.ടി.സി പ്ലാറ്റ്ഫോം വഴിയുള്ള ടിക്കറ്റ് ബുക്കിങ് മൂല്യം 70,000 കോടി രൂപയ്ക്ക് മുകളിലാണ്. ഇതിൽ 20 ശതമാനത്തോളം മാത്രമാണ് ഐ.ആർ.സി.ടി.സിയുടെ 'ഐ-പേ' (i-Pay) വഴി ഇപ്പോൾ നടക്കുന്നത്. വരും വർഷങ്ങളിൽ മുഴുവൻ ടിക്കറ്റ് ബുക്കിങ്ങുകളും സ്വന്തം പ്ലാറ്റ്ഫോമിലേക്ക് മാറ്റുന്നതിലൂടെ വിനിമയ മൂല്യം ഗണ്യമായി ഉയർത്താൻ സാധിക്കുമെന്ന് കമ്പനി കണക്കുകൂട്ടുന്നു. ഇത് വരും വർഷങ്ങളിൽ പൂർണമായും സ്വന്തം പ്ലാറ്റ്ഫോമിലേക്ക് മാറ്റുന്നതോടെ 70,000 കോടി രൂപയുടെ വിനിമയം ഉറപ്പാക്കാൻ സാധിക്കും. ഇതിന് പുറമെ ജി.എസ്.ടി പേയ്മെന്റുകൾ, മുനിസിപ്പൽ നികുതികൾ, വിവിധ സർക്കാർ ട്രഷറികൾ, യൂട്ടിലിറ്റി ബില്ലുകൾ തുടങ്ങിയവയുടെ പണമിടപാടുകൾ കൂടി ഏറ്റെടുക്കുന്നതോടെ ഒരുലക്ഷം കോടി എന്ന ലക്ഷ്യം എളുപ്പത്തിൽ മറികടക്കാനാകുമെന്നാണ് വിലയിരുത്തൽ. സർക്കാർ മേഖലയിലെ ഇടപാടുകളിൽ നിലവിൽ ആർക്കും കുത്തകാവകാശമില്ലാത്തതിനാൽ റെയിൽവേയുടെ ഈ ഉപസ്ഥാപനത്തിന് വിപണിയിൽ വലിയ മുൻതൂക്കം ലഭിക്കുമെന്നാണ് ചൂണ്ടിക്കാട്ടുന്നത്.

ALSO READ: വൈറ്റ്ഹൗസ് കറസ്‌പോണ്ടന്റ് വിരുന്നിനിടെ വെടിയൊച്ച; ട്രംപിനെ സംഭവ സ്ഥലത്തുനിന്ന് ഒഴിപ്പിച്ചു  

പ്രതിദിനം 15 ലക്ഷത്തിലധികം ടിക്കറ്റ് ബുക്കിങ്ങുകൾ കൈകാര്യം ചെയ്യുന്ന ഐ.ആർ.സി.ടി.സി, പേയ്മെന്റ് പ്ലാറ്റ്ഫോമിന്റെ പ്രവർത്തനം വിപുലീകരിക്കുന്നതിനായി ഒരു പ്രമുഖ ടെക്‌നോളജി സർവിസ് പ്രൊവൈഡറെയും നിയമിച്ചിട്ടുണ്ട്. ഒന്നിലധികം ബാഹ്യ പേയ്മെന്റ് പ്ലാറ്റ്‌ഫോമുകളുമായി ചേർന്നാണ് ഇപ്പോൾ പ്രവർത്തിക്കുന്നത്. സ്വന്തം നിലയിലുള്ള പ്രവർത്തനങ്ങൾ ശക്തമാക്കുന്നതോടെ ഈ പങ്കാളിത്തങ്ങളിൽ മാറ്റം വരാൻ സാധ്യതയുണ്ട്. എന്നിരുന്നാലും, പേയ്മെന്റ് അഗ്രഗേഷൻ മേഖലയിലെ ലാഭവിഹിതം വളരെ കുറവാണെന്നത് ഐ.ആർ.സി.ടി.സിക്ക് മുന്നിലെ പ്രധാന വെല്ലുവിളിയാണ്.

ഡിജിറ്റൽ പേയ്മെന്റ് മേഖലയിൽ നിലവിൽ ആധിപത്യം പുലർത്തുന്ന ബിൽഡെസ്‌ക്, റേസർപേ, ഫോൺപേ, പേയു തുടങ്ങിയ പ്രമുഖ പ്ലാറ്റ്ഫോമുകൾക്ക് ഐ.ആർ.സി.ടി.സിയുടെ കടന്നുവരവ് വലിയ വെല്ലുവിളിയാകും.