തിരൂരങ്ങാടി: അമിത വേഗതയില്‍ വന്ന ലോറി നിയന്ത്രണംവിട്ട് കടയിലേക്ക് പാഞ്ഞുകയറി മൂന്ന് പേര്‍ക്ക് പരുക്ക്. കൊടിഞ്ഞി പാലാ പാര്‍ക്കില്‍ ഇന്നലെ വൈകിട്ട് 5.30നാണ് അപകടം. കൊടിഞ്ഞി കടുവള്ളൂര്‍ സ്വദേശി പത്തൂര്‍ മൂത്തുവിന്റെ മകന്‍ അബ്ദുല്‍ ലത്തീഫ് (34), ചെറുപ്പാറ സ്വദേശി പള്ളിയാളി ജമാലിന്റെ മകന്‍ ഇസ്മാഈല്‍ (28), അല്‍ അമീന്‍ നഗര്‍ സ്വദേശി പറങ്ങാംവീട്ടില്‍ പരേതനായ മൊയ്തീന്റെ മകന്‍ അബ്ദുല്‍ മജീദ്(39) എന്നിവര്‍ക്കാണ് പരുക്കേറ്റത്.
ചെറുമുക്കില്‍നിന്നു ചരക്കുകള്‍ കയറ്റുന്നതിനായി ചെമ്മാട്ടേക്കു വരികയായിരുന്ന ലോറി പാലാപാര്‍ക്കില്‍വച്ച് നിയന്ത്രണം വിടുകയായിരുന്നു. മഴ കാരണം റോഡരികില്‍ നിര്‍ത്തിയിട്ടിരുന്ന മൂന്ന് ബൈക്കുകകള്‍ ഇടിച്ചുതെറിപ്പിച്ച ശേഷമാണ് ലോറി കടയിലേക്ക് പാഞ്ഞുകയറിയത്. കടയുടെ വരാന്തയില്‍നിന്നിരുന്നവര്‍ക്കാണ് പരുക്കേറ്റത്.
ഇവരെ തിരൂരങ്ങാടി താലൂക്ക് ആശുപത്രിയില്‍ പ്രവേശിപ്പിച്ചു.