തിരുവനന്തപുരം: നിയമസഭാ തെരഞ്ഞെടുപ്പിലെ തോൽവിക്ക് പിന്നാലെ സിപിഎം സംസ്ഥാന നേതൃത്വത്തിനെതിരെ പാർട്ടിക്കുള്ളിൽ രൂക്ഷവിമർശനം. സിപിഎം സംസ്ഥാന സെക്രട്ടേറിയേറ്റ്, സംസ്ഥാന സമിതി യോഗങ്ങളിലാണ് നേതൃത്വത്തിന്റെ വീഴ്ചകൾ നിരത്തി അംഗങ്ങൾ വിമർശനമുയർത്തിയത്. പ്രധാനമായും മൂന്ന് വിഷയങ്ങളിലാണ് അം​ഗങ്ങൾ അതൃപ്തി വ്യക്തമാക്കിയത്.

തെരഞ്ഞെടുപ്പിലെ സ്ഥാനാർത്ഥി നിർണ്ണയത്തിൽ പാളിച്ചകൾ സംഭവിച്ചുവെന്നും, ഇത് തിരിച്ചടിക്ക് കാരണമായെന്നും അംഗങ്ങൾ ചൂണ്ടിക്കാട്ടി. കൂടാതെ, കണ്ണൂരിൽ പാർട്ടിയിലെ ആഭ്യന്തര പ്രശ്നങ്ങൾ പരിഹരിക്കുന്നതിൽ നേതൃത്വം പരാജയപ്പെട്ടെന്നും അംഗങ്ങൾ അഭിപ്രായപ്പെട്ടു. മാത്രമല്ല, സംസ്ഥാന തലത്തിൽ പാർട്ടിയെ ഏകോപിപ്പിക്കുന്നതിലും സംഘടനാപരമായ പോരായ്മകൾ തിരുത്തുന്നതിലും നേതൃത്വത്തിന് സാധിച്ചില്ലെന്നും യോഗത്തിൽ വിമർശനമുയർന്നു.

ALSO READ: കോടതി ക്വാർട്ടേഴ്‌സിൽ വെച്ച് പാമ്പുകടിയേറ്റു: ചേർത്തല മുൻസിഫ് മജിസ്ട്രേറ്റ് ചികിത്സയിൽ

അതേസമയം, തെരഞ്ഞെടുപ്പിലെ തോൽവി തീർത്തും അപ്രതീക്ഷിതമായിരുന്നുവെന്ന് യോഗത്തിന് ശേഷം മാധ്യമങ്ങളെ കണ്ട സംസ്ഥാന സെക്രട്ടറി എംവി ഗോവിന്ദൻ വ്യക്തമാക്കി. തിരിച്ചടികളിൽ നിന്നും തിരുത്തലുകൾ നടത്തി പാർട്ടി എന്നും തിരിച്ചുവന്നിട്ടുണ്ടെന്ന് അദ്ദേഹം ഓർമ്മിപ്പിച്ചു.