കാക്കനാട്: പുറമെ നല്ല തിളങ്ങുന്ന നിറവും മിനുസമുള്ള ബോഡിയുമായി പേപ്പറുകളെല്ലാം കൃത്യമാക്കി എത്തിയ സ്‌കൂള്‍ ബസ്സുകള്‍ ഫിറ്റ്‌നസ് പരിശോധനയില്‍ കൂട്ടത്തോടെ പരാജയപ്പെട്ടു. നിര്‍ത്തിയിട്ടിരുന്നപ്പോള്‍ നടത്തിയ പരിശോധനകളില്‍ കുഴപ്പങ്ങളൊന്നും കാണാതിരുന്ന വണ്ടികള്‍, ആര്‍.ടി.ഒ നേരിട്ട് ഡ്രൈവിങ് സീറ്റിലിരുന്ന് ഓടിച്ചു നോക്കിയപ്പോഴാണ് സാങ്കേതിക തകരാറുകള്‍ പുറത്തുചാടിയത്.

സുരക്ഷയുടെ കാര്യത്തില്‍ യാതൊരു വിട്ടുവീഴ്ചയ്ക്കും തയ്യാറാകാതിരുന്ന എറണാകുളം ആര്‍.ടി.ഒ കെ.ആര്‍ സുരേഷ്, തകരാറുകള്‍ കണ്ടെത്തിയ 44 സ്‌കൂള്‍ ബസ്സുകള്‍ക്ക് ഫിറ്റ്‌നസ് നിഷേധിച്ചു. ഈ വാഹനങ്ങള്‍ കേടുപാടുകള്‍ തീര്‍ത്ത് വീണ്ടും പരിശോധനയ്ക്ക് ഹാജരാക്കേണ്ടി വരും.

സ്‌കൂള്‍ അധ്യയനവര്‍ഷം തുടങ്ങാന്‍ ദിവസങ്ങള്‍ മാത്രം ബാക്കിനില്‍ക്കെ, സീപോര്‍ട്ട് എയര്‍പോര്‍ട്ട് റോഡിലെ സി.എഫ് ടെസ്റ്റ് ഗ്രൗണ്ടിലായിരുന്നു സ്‌കൂള്‍ ബസ്സുകളുടെ ആദ്യഘട്ട പരിശോധന നടന്നത്. ക്യാമ്പിലെത്തിച്ച ആകെ 60 ബസ്സുകളില്‍ എല്ലാത്തരം സുരക്ഷാ മാനദണ്ഡങ്ങളും പൂര്‍ണ്ണമായി പാലിച്ച 16 എണ്ണത്തിന് മാത്രമാണ് ആദ്യദിനം ഫിറ്റ്‌നസ് സര്‍ട്ടിഫിക്കറ്റ് ലഭിച്ചത്. യോഗ്യത നേടിയ ഈ ബസ്സുകളില്‍ മോട്ടോര്‍ വാഹന വകുപ്പിന്റെ പ്രത്യേക സുരക്ഷാ സ്റ്റിക്കറുകള്‍ പതിപ്പിച്ചു നല്‍കിയിട്ടുണ്ട്.

രാവിലെ എട്ട് മണിയോടെ ആര്‍.ടി.ഒ സുരേഷിന്റെ നേതൃത്വത്തിലുള്ള ഉദ്യോഗസ്ഥ സംഘമാണ് പരിശോധന ആരംഭിച്ചത്. വാഹനം നിര്‍ത്തിയിട്ട ശേഷം ടയറുകള്‍, വൈപ്പര്‍, ഹെഡ്‌ലൈറ്റ്, ബ്രേക്ക് ലൈറ്റ്, വാതിലുകള്‍, വിന്‍ഡോ ഷട്ടറുകള്‍, ജി.പി.എസ്, അഗ്‌നിശമന സംവിധാനങ്ങള്‍, സ്പീഡ് ഗവര്‍ണര്‍ എന്നിവയെല്ലാം ഉദ്യോഗസ്ഥര്‍ കൃത്യമായി പരിശോധിച്ചിരുന്നു. എന്നാല്‍ അവസാനഘട്ടത്തില്‍ ആര്‍.ടി.ഒ തന്നെ നേരിട്ട് ബസ്സുകള്‍ ഓടിച്ചു നോക്കിയതോടെയാണ് പല വണ്ടികളുടെയും യഥാര്‍ഥ അവസ്ഥ വെളിച്ചത്തായത്.

ആദ്യത്തെ ചില ബസ്സുകള്‍ ഓടിച്ചു നോക്കിയപ്പോള്‍ തന്നെ ഗുരുതരമായ സാങ്കേതിക തകരാറുകള്‍ ശ്രദ്ധയില്‍പ്പെട്ടു. ഇതോടെ ഗ്രൗണ്ടിലെത്തിയ മുഴുവന്‍ ബസ്സുകളും ഡ്രൈവ് ചെയ്തു നോക്കിയ ശേഷം മാത്രം ഫിറ്റ്‌നസ് നല്‍കിയാല്‍ മതിയെന്ന് ആര്‍.ടി.ഒ കര്‍ശന നിര്‍ദേശം നല്‍കുകയായിരുന്നു. ഇതാണ് ഭൂരിഭാഗം വണ്ടികളും പരാജയപ്പെടാന്‍ കാരണമായത്. ആദ്യദിനം പങ്കെടുക്കാന്‍ കഴിയാത്തവര്‍ക്കും തകരാറുകള്‍ പരിഹരിച്ച് എത്തുന്നവര്‍ക്കുമായി രണ്ടാംഘട്ട പരിശോധന മെയ് 23ന് നടക്കും.

During a strict fitness inspection in Ernakulam, 44 out of 60 school buses failed the test after the RTO personally test-drove them and uncovered serious technical glitches ahead of the school reopening.