ബെംഗളൂരു: ഉഗാണ്ടയില്‍ നിന്ന് ബംഗളുരു രാജ്യാന്തര വിമാനത്താവളത്തിലെത്തിയ 28 കാരിയുടെ എബോള പ്രാഥമിക പരിശോധനാഫലം നെഗറ്റീവാണെന്ന് കേന്ദ്ര ആരോഗ്യമന്ത്രാലയ വൃത്തങ്ങളെ ഉദ്ധരിച്ച് വാര്‍ത്താ ഏജന്‍സിയായ എ.എന്‍.ഐ റിപ്പോര്‍ട്ട് ചെയ്തു. മുന്‍കരുതല്‍ നടപടിയുടെ ഭാഗമായാണ് നേരിയ ലക്ഷണങ്ങള്‍ ശ്രദ്ധയില്‍പെട്ട  ഉടനെ യുവതിയെ ബംഗളുരുവിലെ സര്‍ക്കാര്‍ പകര്‍ച്ചവ്യാധി ആശുപത്രിയില്‍ നിരീക്ഷണത്തിലാക്കിയതും പരിശോധനകള്‍ക്ക് വിധേയയാക്കിയതും. 

ഉഗാണ്ടയില്‍ നിന്ന് അടുത്തിടെയാണ് യുവതി അഹമ്മദാബാദിലെത്തിയത്. പിന്നീട് ബെംഗളൂരുവിലേക്ക് വരികയായിരുന്നു. എയര്‍പോര്‍ട്ട് സ്‌ക്രീനിങ്ങില്‍ ഇവര്‍ക്ക് ലക്ഷണങ്ങളൊന്നും കാണിച്ചിരുന്നില്ല. എങ്കിലും അസ്വസ്ഥത പ്രകടിപ്പിച്ചതോടെയാണ് മുന്‍കരുതലിന്റെ ഭാഗമായി യുവതിയെ നിരീക്ഷണത്തിലാക്കിയത്. തുടര്‍ന്ന് ഏകദേശം 24 മണിക്കൂറിന് ശേഷം ഇവര്‍ക്ക് നേരിയ ശരീരവേദന അനുഭവപ്പെട്ടതോടെ ക്വാറന്റീനില്‍ പ്രവേശിപ്പിക്കുകയായിരുന്നു. 

യുവതിയുടെ ആരോഗ്യനില നിലവില്‍ തൃപ്തികരമാണെന്നും പൂനെയിലെ നാഷനല്‍ ഇന്‍സ്റ്റിറ്റ്യൂട്ട് ഓഫ് വൈറോളജിയിലേക്ക് അയച്ച സാംപിളുകളുടെ വിശദമായ റിപ്പോര്‍ട്ട് കൂടി വന്ന ശേഷം മാനദണ്ഡങ്ങള്‍ പ്രകാരം ആവശ്യമെങ്കില്‍ മാത്രം വീണ്ടും പരിശോധന നടത്തുമെന്നും അധികൃതര്‍ അറിയിച്ചു.