ലണ്ടന്‍: പതിനൊന്നു വര്‍ഷത്തിനു ശേഷം ഗരത് ബെറ്റിയെന്ന ഓഫ്‌സ്പിന്നറെ ടെസ്റ്റ് ടീമിലേക്ക് തിരിച്ചുവിളിച്ച് ഇംഗ്ലണ്ട് ക്രിക്കറ്റ് ബോര്‍ഡിന്റെ അപ്രതീക്ഷിത തീരുമാനം. ഈ മാസം നടക്കുന്ന ബംഗ്ലാദേശ് ടൂറിനുള്ള ഇംഗ്ലണ്ട് ടീമിലേക്കാണ് 38കാരനായ സറെ കൗണ്ടി ടീം നായകനായ ബെറ്റിയെ തിരഞ്ഞെടുത്തത്.
നേരത്തെ 2005ലാണ് ബെറ്റി അവസാനമായി ഇംഗ്ലണ്ട് ടീമില്‍ കളിച്ചത്. പത്തു ഏകദിന മത്സരങ്ങളും ഏഴു ടെസ്റ്റ് മത്സരങ്ങളിലും ഇംഗ്ലീഷ് കുപ്പായമണിഞ്ഞ താരമാണ് ബെറ്റി. ടെസ്റ്റില്‍ പതിനൊന്നും ഏകദിനത്തില്‍ അഞ്ചും വിക്കറ്റുകളാണ് വീഴ്ത്തിയത്.
നടന്നുകൊണ്ടിരിക്കുന്ന ഇംഗ്ലീഷ് കൗണ്ടി ചാംപ്യന്‍ഷിപ്പില്‍ 41 വിക്കറ്റുകള്‍ വീഴ്ത്തി ഫോമില്‍ നില്‍ക്കുന്നതാണ് ബെറ്റിയ്ക്ക് തുണയായത്. മൊയിന്‍ അലി, ആദില്‍ റഷീദ് എന്നിവര്‍ക്കൊപ്പം ഇംഗ്ലണ്ടിന്റെ മൂന്നാം സ്പിന്നറയാണ് ബെറ്റി ടീമിലിടംപിടിച്ചത്.