കൊച്ചി: കുംഭമേളയ്ക്കിടെ വൈറലായ പെണ്‍കുട്ടിയുടെയും ഭര്‍ത്താവ് മുഹമ്മദ് ഫര്‍മാന്റെയും മുന്‍കൂര്‍ ജാമ്യാപേക്ഷയില്‍ ഹൈക്കോടതി നാളെ വിധി പറയും. 

ഹര്‍ജി ഇന്ന് പരിഗണിച്ചപ്പോള്‍ മധ്യപ്രദേശ് പൊലിസ് ജാമ്യം നല്‍കുന്നതിനെ ശക്തമായി എതിര്‍ത്തു. ഇരുവരുടെയും വിവാഹം അസാധുവാണെന്നായിരുന്നു പൊലിസിന്റെ വാദം.

എന്നാല്‍ താന്‍ പ്രായപൂര്‍ത്തിയായ ആളാണെന്ന് പെണ്‍കുട്ടി കോടതിയെ അറിയിച്ചു. കൂടാതെ റദ്ദാക്കിയ ജനന സര്‍ട്ടിഫിക്കറ്റ് പുനഃസ്ഥാപിക്കണമെന്നും ആവശ്യപ്പെട്ടു.

ALSO READ: നിയമവിരുദ്ധ കെട്ടിടം പൊളിക്കുന്നതിന് പകരം പിഴ ഈടാക്കാം: സുപ്രിംകോടതി 

പ്രായപൂര്‍ത്തിയാകാത്ത പെണ്‍കുട്ടിയെ തട്ടിക്കൊണ്ടുപോയി വിവാഹം കഴിച്ചെന്നാണ് മുഹമ്മദ് ഫര്‍മാനെതിരേയുള്ള കേസ്. നിലവില്‍ പെണ്‍കുട്ടിക്ക് 16 വയസ്സ് മാത്രമെന്നാണ് പൊലിസിന്റെ വാദം.

ജനന സര്‍ട്ടിഫിക്കറ്റില്‍ തിരുത്തല്‍ വരുത്തിയതായും ജനന രജിസ്ട്രാര്‍ക്ക് തെറ്റായ വിവരങ്ങള്‍ നല്‍കിയതായും പൊലിസ് കോടതിയെ അറിയിച്ചു. 

സമര്‍പ്പിച്ച സര്‍ട്ടിഫിക്കറ്റിലെയും ആശുപത്രി രേഖകളിലെയും ജനനത്തീയതികളില്‍ പൊരുത്തക്കേടുകളുണ്ടെന്നും പൊലിസ് ചൂണ്ടിക്കാട്ടി.

ഇരുവരും വ്യത്യസ്ത മതവിഭാഗങ്ങളില്‍പ്പെട്ടവരാണ്. ക്ഷേത്രത്തില്‍ നടന്ന വിവാഹം മതാചാരപ്രകാരമല്ല നടന്നതെന്നും അതിനാല്‍ വിവാഹത്തിന് നിയമസാധുതയില്ലെന്നും പൊലിസ് വാദിച്ചു. പിന്നീട് നടത്തിയ രജിസ്റ്റര്‍ വിവാഹവും നിയമപരമായി നിലനില്‍ക്കില്ലെന്നും അറിയിച്ചു.

പെണ്‍കുട്ടിക്ക് ആവശ്യമായ സംരക്ഷണം നല്‍കാന്‍ തയ്യാറാണെന്നും മധ്യപ്രദേശ് പൊലിസ് കോടതിയെ അറിയിച്ചു.

ഇരു വാദങ്ങളും കേട്ടശേഷം ഹൈക്കോടതി കേസ് നാളത്തേക്ക് മാറ്റി. മുന്‍കൂര്‍ ജാമ്യാപേക്ഷയില്‍ നാളെ വിധി പ്രഖ്യാപിക്കും.

Verdict tomorrow on anticipatory bail plea of Kumbh Mela viral star due to discrepancies in certificate