ഇനി വെറും എട്ട് ദിവസങ്ങൾ മാത്രം... കാൽപ്പന്ത് പ്രേമികൾ നെഞ്ചിലേറ്റിയ ആ മഹാമേളയ്ക്ക് വീണ്ടും അരങ്ങുണരുകയാണ്. ലോകം മുഴുവൻ ഇനി ഒരു മാസക്കാലത്തേക്ക് തുകൽ പന്തിന്റെ മാന്ത്രികവലയത്തിലേക്ക് ചുരുങ്ങും. ചരിത്രത്തിലാദ്യമായി മൂന്ന് രാജ്യങ്ങൾ—അമേരിക്ക, മെക്‌സിക്കോ, കാനഡ—ആതിഥേയത്വം വഹിക്കുന്ന 2026 ഫിഫ ലോകകപ്പ് ജൂൺ 11 മുതൽ ജൂലൈ 17 വരെയാണ് നടക്കുന്നത്.

ലോക ചാമ്പ്യനായി മിശിഹായുടെ വരവ്

ഇത്തവണത്തെ 23-ാം ലോകകപ്പ് എഡിഷനിൽ അർജന്റൈൻ ഇതിഹാസം ലയണൽ മെസി എത്തുന്നത് ഒരു സാധാരണ താരമായല്ല, മറിച്ച് നിലവിലെ ലോക ചാമ്പ്യനായാണ്. കഴിഞ്ഞ തവണ ഖത്തറിന്റെ മണ്ണിൽ, കിരീടത്തിൽ ഒരിക്കലെങ്കിലും മുത്തമിടണമെന്ന തീവ്രമായ ആഗ്രഹത്തോടെയെത്തിയ മിശിഹാ, ആ കനക സിംഹാസനം കൈപ്പിടിയിലൊതുക്കിയാണ് അർജന്റീനയിലേക്ക് മടങ്ങിയത്.

2022ൽ നുണഞ്ഞ ആ മധുരം ഒരിക്കൽ കൂടി ആസ്വദിക്കാൻ, തന്റെ 38-ാം വയസ്സിലും പ്രിയ ലിയോ വിശ്വവേദിയിലേക്ക് ബൂട്ട് കെട്ടുമ്പോൾ ആരാധകരുടെ ആവേശം വാനോളമാണ്. കഴിഞ്ഞ മൂന്ന് വർഷത്തോളമായി താൻ പന്തുതട്ടി പരിചയമുള്ള അമേരിക്കൻ മണ്ണിൽ വീണ്ടുമൊരു കപ്പുയർത്തുക എന്നതിലപ്പുറം നീലക്കുപ്പായത്തിലെ പത്താം നമ്പറുകാരന് മറ്റൊന്നും ലക്ഷ്യമിടാനില്ല.

തകർക്കാനാകാത്ത റെക്കോഡുമായി മെസി

ഇത്തവണ ചാമ്പ്യൻ പട്ടം നിലനിർത്താൻ മാത്രമല്ല, ലോകകപ്പ് ചരിത്രത്തിൽ മറ്റാർക്കും അവകാശപ്പെടാനില്ലാത്ത ഒരു വമ്പൻ റെക്കോഡുമായാണ് മെസി കളത്തിലിറങ്ങുന്നത്. ലോകകപ്പിൽ ഏറ്റവും കൂടുതൽ മത്സരങ്ങൾ കളിച്ച താരം എന്ന റെക്കോഡ് ഇപ്പോൾ മെസിയുടെ പേരിലാണ്. അഞ്ച് ലോകകപ്പുകളിലായി താരം ഇതിനകം 26 മത്സരങ്ങളിൽ അർജന്റീനയ്ക്കായി ബൂട്ട് കെട്ടിക്കഴിഞ്ഞു.

കഴിഞ്ഞ ഖത്തർ ലോകകപ്പിന്റെ ഫൈനലിലാണ് ജർമനിയുടെ മുൻ ഇതിഹാസം ലോത്തർ മത്തേയൂസിനെ (25 മത്സരങ്ങൾ) മറികടന്ന് മെസി ഈ ചരിത്രനേട്ടം സ്വന്തമാക്കിയത്. ഇത്തവണ കളത്തിലിറങ്ങുന്നതോടെ തന്റെ തന്നെ റെക്കോഡ് കൂടുതൽ ഉയരങ്ങളിലേക്ക് എത്തിക്കാൻ മെസിക്ക് സാധിക്കും.

റൊണാൾഡോ അഞ്ചാം സ്ഥാനത്ത്

മെസിയെപ്പോലെ തന്നെ തന്റെ ആറാം ലോകകപ്പിനായി പോർച്ചുഗലിന്റെ ഇതിഹാസ താരം ക്രിസ്റ്റ്യാനോ റൊണാൾഡോയും ഇത്തവണ കളത്തിലുണ്ടാകും. എന്നാൽ മത്സരങ്ങളുടെ എണ്ണത്തിൽ സിആർ7 മെസിയെക്കാൾ ബഹുദൂരം പിന്നിലാണ്. പട്ടികയിൽ അഞ്ചാം സ്ഥാനത്താണ് റൊണാൾഡോ. അഞ്ച് ലോകകപ്പുകളിലായി 22 മത്സരങ്ങളിലാണ് താരം പോർച്ചുഗലിനായി കളത്തിലിറങ്ങിയത്.

ഫിഫ ലോകകപ്പിൽ ഏറ്റവും കൂടുതൽ മത്സരങ്ങൾ കളിച്ച താരങ്ങൾ:

1. ലയണൽ മെസി (അർജന്റീന) – 26
2. ലോത്തർ മത്തേയൂസ് (ജർമനി) – 25
3. മിറോസ്ലാവ് ക്ലോസെ (ജർമനി) – 24
4. പൗലോ മാൽഡീനി (ഇറ്റലി) – 23
5. ക്രിസ്റ്റ്യാനോ റൊണാൾഡോ (പോർച്ചുഗൽ) – 22
6. ഡീഗോ മറഡോണ (അർജന്റീന) – 21
7. ഉവെ സീലർ (ജർമനി) – 21
8. വ്ലാഡിസ്ലാവ് സ്മൂഡ (പോളണ്ട്) – 21
9. കഫു (ബ്രസീൽ) – 20