കോഴിക്കോട്: നഗരത്തിൽ രോഗിയുമായി പോയ ആംബുലൻസ് നിയന്ത്രണം വിട്ടു മറിഞ്ഞ് ചികിത്സയിലായിരുന്ന വയോധിക മരിച്ചു. പെരിങ്ങളം സ്വദേശിനി ജാനകി (82) ആണ് മരിച്ചത്. ആംബുലൻസിലുണ്ടായിരുന്ന മറ്റു രണ്ടുപേർക്ക് അപകടത്തിൽ പരുക്കേറ്റു. ഇന്ന് പുലർച്ചെ കോഴിക്കോട് കോട്ടപ്പറമ്പിലാണ് ദാരുണമായ സംഭവം നടന്നത്.

തീവ്രമായ ശ്വാസംമുട്ടലിനെ തുടർന്ന് ജാനകിയെ അടിയന്തര ചികിത്സയ്ക്കായി മെഡിക്കൽ കോളേജ് ആശുപത്രിയിലേക്ക് കൊണ്ടുപോകുന്നതിനിടെയാണ് അപകടമുണ്ടായത്. കോട്ടപ്പറമ്പ് എത്തിയപ്പോൾ ആംബുലൻസിന്റെ നിയന്ത്രണം നഷ്ടപ്പെടുകയും റോഡിലേക്ക് മറിയുകയുമായിരുന്നു.

അപകടസമയത്ത് പ്രദേശത്ത് കനത്ത മഴ പെയ്തിരുന്നതായും ഇതാണ് നിയന്ത്രണം നഷ്ടപ്പെടാൻ കാരണമായതെന്നുമാണ് പ്രാഥമിക നിഗമനം. പരുക്കേറ്റവരെ ഉടൻ തന്നെ സമീപത്തെ ആശുപത്രിയിൽ പ്രവേശിപ്പിച്ചു. പൊലിസെത്തി മേൽനടപടികൾ സ്വീകരിച്ചു.

an ambulance carrying a patient lost control and overturned in kozhikode. the patient tragically died in the accident, and two others sustained injuries.