കൊച്ചി: സി.എം.ആര്‍.എല്‍- എക്സാലോജിക് മാസപ്പടി കേസില്‍ മുന്‍മുഖ്യമന്ത്രി പിണറായി വിജയന്റെ മകള്‍ ടി വീണയെ ചോദ്യം ചെയ്യാന്‍ അനുമതി. വീണയ്ക്ക് ഇ.ഡി ഇന്ന് സമന്‍സയക്കും. ചോദ്യംചെയ്യാന്‍ വെള്ളിയാഴ്ച ഹാജരാകണമെന്ന് നിര്‍ദ്ദേശിക്കുമെന്നാണ് സൂചന. വീണയടക്കം ഒമ്പത് പേര്‍ക്കാണ് സമന്‍സയക്കുന്നത്. ശശിധരന്‍ കര്‍ത്തയ്ക്കും മകനും നോട്ടിസ് അയക്കും. ആറ് സി.എം.ആര്‍.എല് ജീവനക്കാര്‍ക്കും നോട്ടിസ് അയക്കും. 

സി.എം.ആര്‍.എല്‍- എക്സാലോജിക് ഇടപാടില്‍ എസ്.എഫ്.ഐ.ഒ കണ്ടെത്തിയ തെളിവുകള്‍ ഇ.ഡിക്ക് നല്‍കാന്‍ എറണാകുളം അഡീഷണല്‍ സെഷന്‍സ് കോടതി ജഡ്ജി സുരേഷ് ബാബു കഴിഞ്ഞ ദിവസം ഉത്തരവിട്ടിരുന്നു. പിന്നാലെയാണ് ഇ.ഡി സമന്‍സയച്ചിരിക്കുന്നത്. വീണയുടെ മൊഴിയും അക്കൗണ്ട് വിവരങ്ങളും ഉള്‍പ്പെടെ കുറ്റപത്രത്തോടൊപ്പം സമര്‍പ്പിച്ച മുഴുവന്‍ രേഖകളും നല്‍കണമെന്നായിരുന്നു നിര്‍ദേശം. 

തെളിവുകള്‍ ഇ.ഡിക്ക് കൈമാറണമെന്ന് കോടതി
കൊച്ചി: സി.എം.ആര്‍.എല്‍- എക്സാലോജിക് ഇടപാടില്‍ എസ്.എഫ്.ഐ.ഒ കണ്ടെത്തിയ തെളിവുകള്‍ ഇ.ഡിക്ക് നല്‍കാന്‍ എറണാകുളം അഡീഷണല്‍ സെഷന്‍സ് കോടതി ജഡ്ജി സുരേഷ് ബാബു ഉത്തരവിട്ടു. 
ടി. വീണയുടെ മൊഴിയും അക്കൗണ്ട് വിവരങ്ങളും ഉള്‍പ്പെടെ കുറ്റപത്രത്തോടൊപ്പം സമര്‍പ്പിച്ച മുഴുവന്‍ രേഖകളും നല്‍കണമെന്നാണ് നിര്‍ദേശം. 

കേന്ദ്ര കോര്‍പറേറ്റ് കാര്യ മന്ത്രാലയത്തിന് കീഴിലെ സീരിയസ് ഫ്രോഡ് ഇന്‍വെസ്റ്റിഗേഷന്‍ ഓഫിസ് അന്വേഷണം നടത്തി നല്‍കിയ റിപോര്‍ട്ടിലെ 54 വാല്യങ്ങളിലെ 134 സെറ്റ് രേഖകളാണ് ഇ.ഡിക്ക് കൈമാറുക. അന്വേഷണത്തിന് ഹൈക്കോടതി ഡിവിഷന്‍ ബെഞ്ച് അനുമതി നല്‍കിയ സാഹചര്യത്തിലാണ് ഇ.ഡി രേഖകള്‍ ആവശ്യപ്പെട്ട് പി.എം.എല്‍.എ കോടതിയെ സമീപിച്ചത്.