ഓമശ്ശേരി: സ്‌കൂളില്‍ കുട്ടികള്‍ കുറയുന്നുവെന്നും പൂട്ടിപ്പോകുമെന്നുമുള്ള ആശങ്ക അറിയിച്ച് മുഖ്യമന്ത്രിക്ക് നാലാക്ലാസുകാരിയുടെ കത്ത്. പൂളപ്പൊയില്‍ ഗവ. എല്‍.പി സ്‌കൂള്‍ നാലാം ക്ലാസ് വിദ്യാര്‍ഥി ഓമശ്ശേരി പെരുന്തോട്ടത്തില്‍ റഷീദിന്റെ മകള്‍ ഹാദിയയാണ് മുഖ്യമന്ത്രിക്കു കത്തയച്ചിരിക്കുന്നത്. താന്‍ മോളുടെ സ്‌കൂള്‍ നേരിട്ടു സന്ദര്‍ശിക്കാമെന്ന് മുഖ്യമന്ത്രിയുടെ മറുപടിയും നല്‍കിയിട്ടുണ്ട്.  

മുഖ്യമന്ത്രി സ്‌കൂള്‍ സന്ദര്‍ശിച്ചാല്‍ സ്‌കൂളിനു നല്ല പബ്ലിസിറ്റി കിട്ടുമെന്നും കൂടുതല്‍ കുട്ടികള്‍ സ്‌കൂളില്‍ പ്രവേശനം തേടുമെന്നും ഹാദിയ കത്തില്‍ കുറിച്ചിരുന്നു. സ്‌കൂള്‍ പരിസരത്തെ കുട്ടികള്‍പോലും ഇപ്പോള്‍ ഇവിടെ അഡ്മിഷന്‍ എടുക്കുന്നില്ല. ഭാവിയില്‍ സ്‌കൂള്‍ ഇല്ലാതാകുമോ എന്നാണ് പേടി. തന്റെ ആശങ്ക ഈ കൊച്ചുമിടുക്കി പങ്കുവെച്ചു. 

ALSO READ: വയനാട്ടില്‍ ഷിഗല്ല; അതീവ ജാഗ്രത, പ്രതിരോധം ഊര്‍ജ്ജിതമാക്കി ആരോഗ്യ വകുപ്പ്, ഇന്ന് മന്ത്രിതല യോഗം

ഒരു ദിവസം സ്‌കൂളില്‍ വരുമെന്നും മോളെയും ടീച്ചര്‍മാരെയും കാണുമെന്നും മുഖ്യമന്ത്രി മറുപടിക്കത്തില്‍ ഉറപ്പ് നല്‍കുന്നു. സ്‌കൂളിലേക്കു കൂടുതല്‍ കുട്ടികളെ എത്തിക്കാന്‍ ശ്രമിക്കുമെന്നും മുഖ്യമന്ത്രി പറഞ്ഞിട്ടുണ്ട്. തിരക്ക് കാരണം കത്ത് വായിക്കാന്‍ വൈകിപ്പോയതിനാലാണ് മറുപടി വൈകിയത്. മോള്‍ നന്നായി പഠിക്കണമെന്നും ടീച്ചര്‍മാരോട് അന്വേഷണം പറയണമെന്നും മുഖ്യമന്ത്രി കത്തില്‍ കുറിച്ചു. 

പൂളപ്പൊയില്‍ ജി.എല്‍.പി സ്‌കൂളില്‍ ഈ അധ്യയന വര്‍ഷം വിദ്യാര്‍ഥി പ്രവേശനം തീരെ കുറഞ്ഞതായി അധ്യാപകര്‍ പറയുന്നു. 

a fourth standard student from a government lp school in kozhikode wrote to the chief minister expressing concern over declining student admissions and the possible closure of her school. the chief minister replied promising a visit.