കൊച്ചി: കെഎസ്ആര്‍ടിസി ബസുകളില്‍ വനിതകള്‍ക്ക് സൗജന്യ യാത്രാസൗകര്യം ഏര്‍പ്പെടുത്താനുള്ള സര്‍ക്കാര്‍ തീരുമാനത്തിനെതിരെ വ്യത്യസ്തമായ സമരമുറയുമായി ഒരു സ്വകാര്യ ബസുടമ രംഗത്ത്. എറണാകുളം ജില്ലയിലെ ആലുവ മാഞ്ഞാലി റൂട്ടിലോടുന്ന 'ലിറ്റില്‍ ഫ്‌ലവര്‍' എന്ന ബസാണ് ഈ വേറിട്ട പ്രതിഷേധത്തിന് വേദിയാകുന്നത്.

ജൂണ്‍ 15 തിങ്കളാഴ്ച മുതല്‍ കെഎസ്ആര്‍ടിസിയില്‍ സ്ത്രീകള്‍ക്ക് സൗജന്യ യാത്ര തുടങ്ങാനിരിക്കെ, അതേദിവസം തന്റെ ബസില്‍ പുരുഷന്മാര്‍ക്ക് സൗജന്യമായി യാത്ര ചെയ്യാമെന്നാണ് ബസുടമയായ വട്ടപ്പറമ്പ് സ്വദേശി ഡേവിസ് പ്രഖ്യാപിച്ചിരിക്കുന്നത്. തിങ്കളാഴ്ച രാവിലെ 6.30 മുതല്‍ രാത്രി 8 മണി വരെയുള്ള എല്ലാ ട്രിപ്പുകളിലും ലിറ്റില്‍ ഫ്‌ലവര്‍ ബസില്‍ പുരുഷന്മാര്‍ക്ക് ടിക്കറ്റ് ഉണ്ടായിരിക്കില്ല. ഇതോടൊപ്പം, തങ്ങളെ കൈവിടാതെ ബസിനെ ആശ്രയിക്കുന്ന വനിതാ യാത്രക്കാര്‍ക്ക് മധുരം നല്‍കി സ്വീകരിക്കാനും ഉടമ തീരുമാനിച്ചിട്ടുണ്ട്.

ആലുവ -മാഞ്ഞാലി റൂട്ടില്‍ ഭൂരിഭാഗവും കെഎസ്ആര്‍ടിസി സര്‍വീസുകളാണുള്ളത്. കഴിഞ്ഞ 25 വര്‍ഷത്തിലേറെയായി ഈ മേഖലയില്‍ സര്‍വീസ് നടത്തുന്ന തനിക്ക് പുതിയ സര്‍ക്കാര്‍ തീരുമാനം വലിയ തിരിച്ചടിയാകുമെന്ന് ഡേവിസ് ആശങ്കപ്പെടുന്നു. ബസ് യാത്രക്കാരില്‍ ഭൂരിഭാഗവും സ്ത്രീകളായതിനാല്‍, കെഎസ്ആര്‍ടിസിയുടെ ഈ പദ്ധതി സ്വകാര്യ ബസുകളിലെ യാത്രക്കാരുടെ എണ്ണത്തില്‍ വന്‍ കുറവുണ്ടാക്കും. ഇത് സ്വകാര്യ ബസ് വ്യവസായത്തിന്റെ നിലനില്‍പ്പിനെത്തന്നെ ബാധിക്കുമെന്ന ആശങ്കയിലാണ് ബസുടമകള്‍.

A private bus owner on the Aluva-Manjali route in Kochi is staging a unique protest against the government's free KSRTC travel scheme for women by offering free rides to male passengers and distributing sweets to women on Monday.