പേരൂര്‍ക്കട: നിയന്ത്രണംവിട്ട കാര്‍ ഓട്ടോയിലിടിച്ചു. ഓട്ടോ ഡ്രൈവര്‍ക്കും യാത്രക്കാരനും പരുക്കേറ്റു. ഇന്നലെ  വൈകിട്ട് വാഴോട്ടുകോണം ജങ്ഷനിലായിരുന്നു അപകടം.  വട്ടിയൂര്‍ക്കാവില്‍നിന്നു വാഴോട്ടുകോണത്തേക്ക് വരികയായിരുന്ന ഇന്നോവാ കാര്‍ നിയന്ത്രണംവിട്ട് അതേദിശയില്‍ സഞ്ചരിച്ച ഓട്ടോയില്‍ ഇടിക്കുകയായിരുന്നു.  ഈ ഓട്ടോ റോഡരികില്‍  നിര്‍ത്തിയിട്ടിരുന്ന മറ്റൊരു ഓട്ടോയില്‍ ഇടിച്ചശേഷം സമീപത്തെ സ്വകാര്യവ്യക്തിയുടെ മതിലിലേക്ക് ഇടിച്ചുകയറി നിന്നു.
ഡ്രൈവര്‍ കുണ്ടമണ്‍കടവ് സ്വദേശി അഭി (21), യാത്രക്കാരന്‍ വാഴോട്ടുകോണം സ്വദേശി ഗോപകുമാര്‍ (46) എന്നിവര്‍ക്കാണ് പരുക്കേറ്റത്.  ഇവരെ തിരുവനന്തപുരം മെഡിക്കല്‍കോളജ് ആശുപത്രിയില്‍ പ്രവേശിപ്പിച്ചു. പാര്‍ക്ക് ചെയ്തിരുന്ന ഓട്ടോറിക്ഷയില്‍ ആരും ഉണ്ടായിരുന്നില്ല. രണ്ട് ഓട്ടോകളും ഭാഗികമായി തകര്‍ന്നിട്ടുണ്ട്.   കാര്‍ ഡ്രൈവര്‍ ഓടിരക്ഷപ്പെട്ടു. മൂന്നു വാഹനങ്ങളും ട്രാഫിക് പൊലിസ് കസ്റ്റഡിയിലെടുത്തു.