കൊല്ലം: പ്രധാനമന്ത്രി നരേന്ദ്ര മോദിയുടെ ജന്മദിനത്തിന്റെ പശ്ചാത്തലത്തില്‍ ഗുജറാത്തിലെ ദലിത് പ്രക്ഷോഭനായകന്‍ ജിഗ്നേഷ് മേവാനി ഉള്‍പ്പെടെ സാമൂഹ്യ-രാഷ്ട്രീയ രംഗത്ത് പ്രവര്‍ത്തിക്കുന്നവരെ പൊലിസിനെക്കൊണ്ട് കസ്റ്റഡിയില്‍ എടുത്ത് വീട്ടുതടങ്കലിലാക്കിയത് കടുത്ത ഫാസിസ്റ്റ് നടപടിയാണെന്ന് കേരള ദലിത് ഫെഡറേഷന്‍ (കെ.ഡി.എഫ്) സംസ്ഥാന പ്രസിഡന്റ് പി. രാമഭദ്രന്‍ പ്രസ്താവിച്ചു.
 എല്ലാ മനുഷ്യാവകാശങ്ങളും നിഷേധിക്കപ്പെട്ട് നരകയാതന അനുഭവിക്കുന്ന ഗുജറാത്തിലെ ദലിതരുടെ സ്വാതന്ത്ര്യത്തിന് വേണ്ടി പോരാടിയെന്ന അപരാധമാണ് ജിഗ്നേഷ് മേവാനി ചെയ്തതെങ്കില്‍ ഇനി ഇന്ത്യയിലെ മുഴുവന്‍ ദലിത് പ്രസ്ഥാനങ്ങളും അത് ഏറ്റെടുത്ത് മുന്നോട്ട് നീങ്ങുന്ന അവസ്ഥ സംജാതമാകുന്നതെന്ന് അദ്ദേഹം പറഞ്ഞു
നരേന്ദ്ര മോദി അധികാരത്തില്‍ വന്നതിന് ശേഷം ദലിത് വിരുദ്ധതതയുടെയും പീഡനത്തിന്റെയും ആഘോഷം കൂടിയാണ് ഗുജറാത്തില്‍ നടക്കുന്നത്. ഭാരതം ഉദ്‌ഘോഷിക്കുന്ന ജനാധിപത്യവും മനുഷ്യാവകാശവും പൗരസ്വാതന്ത്ര്യവും ബി.ജെ.പി ഭരണത്തില്‍ കൊല ചെയ്യപ്പെടുന്നതിന്റെ സന്ദേശം കൂടിയാണ് അറസ്റ്റിലൂടെയും തടങ്കലിലൂടെയും അവര്‍ നടപ്പിലാക്കിക്കൊണ്ടിരിക്കുന്നത്. ജനിച്ചുവളര്‍ന്ന മണ്ണില്‍ അഭയാര്‍ഥികളുടെ സ്ഥാനം പോലും ദലിതര്‍ക്കും മുസ്‌ലിംങ്ങള്‍ക്കും കല്‍പിക്കാത്ത ബി.ജെ.പി യുടെയും സംഘ്പരിവാറുകാരുടെയും ഫാസിസ്റ്റ് നിലപാട് ഏറെക്കാലം ഇന്ത്യയിലെ മതേതരവിശ്വാസികളും മനുഷ്യസ്‌നേഹികളും വച്ച് പൊറിപ്പിക്കില്ലെന്ന് രാമഭദ്രന്‍ മുന്നറിയിപ്പ് നല്‍കി.